Արսեն Ոսկանյանի ընտանիքը ժխտում է Կոլումբիայում նրա մահվան մասին լուրը

PanARMENIAN.Net - ՀՀ և ՌԴ քաղաքացիԱրսեն Ոսկանյանի ընտանիքը ժխտում է Կոլումբիայում նրա մահվան մասին լուրը, որի մասին սեպտեմբերի 2-ին հայտնել էր Reuters գործակալությունը: Ասվում էր, որ 2016-ի նոյեմբերին նրան գերեվարել էին կոլումբիական Ազգային ազատագրման բանակի գրոհայինները, որտեղ էլ նա սպանվել է:

Արսենի հարազատ եղբայրը՝ Արմեն Ոսկանյանը հերքել է Reuters-ի հաղորդագրությունը՝ նշելով, որ դա հնացած տեղեկատվություն է, որը ԶԼՄ-ները պարբերաբար հրապարակում են՝ սենսացիա որոնելով, հայտնում է Rusarminfo-ն:

«Եղբորս մահը պաշտոնապես հաստատված չէ: Մինչ օրս ոչ ոք փաստացի չի ապացուցել, որ նա սպանված է: Հրամանատարը, որը Reuters-ին է հայտնել եղբորս մահվան մասին, նույն բանն ասել էր այն ժամանակ, երբ Արսենը փախել էր գերությունից: Բայց հետո մեզ հայտնեցին, որ նա ողջ է և նրա որոնումների համար Կոլումբիայի բանակի ուղղաթիռներ են օդ բարձրացվել»,-ասել է Ոսկանյանը:

Ըստ նրա, Արսենի որոնումների ընթացքում Կոլումբիայի բանակի և ապստամբների միջև փոխհրաձգություններ են եղել, սակայն որոնումները չեն դադարեցվել:

«Կոլումբիայում ՌԴ դեսպանատունը տեղեկություն չունի եղբորս մահվան մասին: Ուստի մենք չենք կորցնում հույսը, որ նա ողջ է»,-ասել է Ոսկանյանը:

ՀՀ և ՌԴ քաղաքացի Արսեն Ոսկանյանը Կոլումբիա է մեկնել 2016-ի սկզբին, իսկ նոյեմբերին գերեվարվել է Ազգային ազատագրման բանակի գրոհայինների կողմից: 2017-ի հունվարին կոլումբիական Tiempo-ն հայտնեց, որ Կարմիր խաչի միջազգային կոմիտեի միջնորդությամբ ՌԴ քաղաքացին ազատվել է գերությունից: Սակայն ապրիլի 24-ին հայտնի դարձավ, որ ՌԴ քաղաքացի Արսեն Ոսկանյանը, որը գերեվարվել էր Կոլումբիայում Ազգային ազատագրման բանակի ապստամբ խմբավորման կողմից, խլել է զենքն իրեն հսկող զինյալներից, վիրավորել 5 անձի և փախել: