Խոսրովի արգելոցում և Արտավանում հրդեհների քրգործերը Քննչական կոմիտեի վարույթում են

PanARMENIAN.Net - Խոսրովի արգելոցում ևՎայոց ձորի մարզի Արտավան համայնքումբռնկված հրդեհների դեպքերով հարուցված քրեական գործերը գտնվում են Քննչական կոմիտեի վարույթում։

Խոսրովի արգելոցի հրդեհի դեպքի առթիվ՝ ՀՀ քրեական օրենսգրքի 186-րդ հոդվածի 2-րդ մասի և 297-րդ հոդվածի 1-ին մասի հատկանիշներով հարուցված քրեական գործերով նախաքննություն է ընթանում: Այդ մասին PanARMENIAN.Net ին են հայտնել ՀՀ գլխավոր դատախազությունից։

186-րդ հոդվածի 2-րդ մասը՝ գույքն անզգուշությամբ ոչնչացնելը կամ վնասելը կրակի կամ առավել մեծ վտանգի այլ աղբյուրի հետ անզգույշ վերաբերվելու հետևանքով, ենթադրում է պատիժ տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով, կամ ուղղիչ աշխատանքներով՝ մեկից երկու տարի ժամկետով, կամ ազատազրկմամբ՝ առավելագույնը 2 տարի ժամկետով:

Իսկ 297-րդ հոդվածի 1-ին մասը՝անտառներ, ինչպես նաև անտառային ֆոնդի մեջ չմտնող տնկարկներ ոչնչացնելը կամ վնասելը, որը կատարվել է կրակի, պայթուցիկ նյութերի կամ առավել վտանգի այլ աղբյուրի հետ անզգույշ վերաբերմունքի արդյունքում, պատժվում է տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով, կամ ուղղիչ աշխատանքներով՝ առավելագույնը երկու տարի ժամկետով, կամ ազատազրկմամբ՝ առավելագույնը երկու տարի ժամկետով:

Արտավան համայնքի հարակից տարածքում բռնկված հրդեհի դեպքի առթիվ էլ մեղադրանք էր առաջադրվել Արտավան համայնքի բնակիչներից մեկին, դարձյալ վերոնշյալ հոդվածներով։ Գործի նախաքննությունը շարունակվում է։