ԱՄՆ Պետդեպը ոգևորված է Երևանում ցուցարարների մեծ մասի ու ոստիկանության հարգալից վարքից

PanARMENIAN.Net - ԱՄՆ պետքարտուղարությունը պաշտոնապես արձագանքել է Հայաստանում ընթացող վերջին քաղաքական զարգացումներին:

Պետքարտուղարության հայտարարության մեջ մասնավորապես նշված է.«Մենք նկատել ենք, որ Երևանում և Հայաստանի այլ քաղաքներում ընթանում են զգալի քանակությամբ բողոքի ցույցեր: Հայաստանի հազարավոր քաղաքացիներ դուրս են եկել փողոցներ՝ իրականացնելու իրենց ազատ կամաարտահայտման և հավաքներ իրականացնելու իրավունքը: Մենք մոտիկից հետևում ենք Երևանի կենտրոնում և Հայաստանի այլ քաղաքներում ընթացող բողոքի ցույցերին», հայտնում է «Ամերիկայի ձայնը»:

«Մեզ ոգևորում է ցուցարարների մեծ մասի ու ոստիկանության հարգալից և պատասխանատու վարքի դրսևորումն այս վերջին մի քանի օրերի ընթացքում: Մենք անհանգստացած ենք, սակայն, ոստիկանության և ցուցարարների միջև երբեմն տեղի ունեցող բախումների մասին տեղեկությամբ, որի ընթացքում եղել են տուժածներ: Կոչ ենք անում բոլոր կողմերին զսպվածություն ցուցաբերել և խուսափել որևէ լարվածությունից կամ բռնի գործողություններից»:

Երևանում Սերժ Սարգսյանի վարչապետության դեմ ցույցերի 5-րդ օրը՝ ապրիլի 17-ին, ցուցարարները շրջել են քաղաքում և շրջափակում կառավարական շենքեր: Ապրիլի 17-ին «Մերժիր Սերժին» և «Իմ քայլը» նախաձեռնությունները հանրահավաք են անցկացնում Երևանի Հանրապետության հրապարակում։ Փաշինյանը հայտարարել էր «Թավշյա հեղափոխություն» սկսելու մասին:

Նույն օրը ուշ երեկոյան «Մերժիր Սերժին» և «Իմ Քայլը» նախաձեռնությունների երթի ավարտից հետո Թումանյան-Մաշտոց խաչմերուկում դիմակավորված երիտասարդներ սկսեցին ջարդել լուսափորները, հայհոյել վարորդներին և տարբեր իրեր շպրտել ոստիկանական մեքենաների վրա։ Կան տուժածներ։