Վիգեն Սարգսյան. Պետհամակարգը կաթվածահար չի եղել

PanARMENIAN.Net - Այն, ինչ տեղի է ունենում Հայաստանում, փոխշաղկապվածության մեջ է բանակի մարտունակության, պատրաստվածության աստիճանի հետ: Հանրային հեռուստատեսության եթերում ասել է ՀՀ պաշտպանության նախարար Վիգեն Սարգսյանը՝ անդրադառնալով ՀՀ վարչապետ Սերժ Սարգսյանի պաշտոնավորման դեմ պայքարող ընդդիմության գործողություններին:

«Պատկերացրեք՝ եթե նման իրադարձություններն ունենային ներուժ ներազդելու, իրոք կաթվածահար անելու պետական ողջ համակարգը: Յուրաքանչյուրը հասկանում է, որ երկրի մարտունակությունը մեծապես կտուժեր դրանից», - ասել է Սարգսյանն ու հավելել, որ ըստ իրեն, ընդդիմությունը չի կարողացել կաթվածահար անել պետական համակարգը:

Նրա խոսքով, այս իրադարձությունները կանխատեսելի էին՝ հաշվի առնելով «որոշ գործիչների փորձը իրավիճակը որպես տեղեկատվական առիթ օգտագործելու և ծայրահեղականացնելու»:

«Ես չեմ կարողանում պատասխանել այն հարցին, թե ո՞րն է այս իրադարձությունների տեղկատվական առիթը, ո՞րն է դրդապատճառը: Մենք մեկ տարի առաջ անցել ենք բավականին լուրջ գործընթացով, որը կոչվում է խորհրդարանական ընտրություն: Առաջին անգամ վերջին տասը տարում այդ խորհրդարանի ձևավորման նկատմամբ գոյություն ունի հանրային բավականին բարձր վստահություն: Այն կարևորագույն հարցերը որոնք կապվում էին ընտրությունների հետ՝ կրկնակի քվեարկություն, այլոց փոխարեն քվեարկություն, լցոնում և այլն, իսպառ, կարծես թե, բացառվել են, ընտրական օրենսգրքով նախատեսված ընթացակարգերով», - ասել է Սարգսյանը:

Ապրիլի 18-ին Վիգեն Աարգսյանը վերանշանակվել է պաշտպանության նախարարի պաշտոնում: