Էրեբունու ՀՀԿ-ական թաղապետը հրաժարական է տվել

PanARMENIAN.Net - Երևանի Էրեբունի վարչական շրջանի ղեկավար Դավիթ Գրիգորյանը հրաժարական է տվել: Այդ մասին նա հայտնել է իր ֆեյսբուքյան էջում:

«Իմ շատ սիրելի Էրեբունցիներ, նախորդ տարվա սկզբից մենք միասին սկսեցինք կառուցել ու բարեկարգել մեր սիրելի Էրեբունին: Մեր համագործակցության արդյունքում միասին հասցրեցինք տարբեր ծրագրեր կյանքի կոչել: Որոշներն արդեն իրականություն են՝ մյուսները դեռ ընթացքի մեջ: Բարեկարգ փողոցներ, նոր բակեր ու խաղահրապարակներ, շուտով արդեն նոր մեծ այգի, որը ի դեպ բացառիկ նվեր է 2800-ամյա մեր քաղաքին և հենց այդտեղ էրեբունցիներով առաջին անգամ կնշենք մեր սիրելի քաղաքի տոնը: Մենք հասցրեցինք նաև ամբողջությամբ հիմնանորոգել մանկապատանեկան ստեղծագործական կենտրոնը, բացել նոր ամբողջությամբ վերանորոգված մանկապարտեզ ու սա դեռ սկիզբն էր…

Այս ընթացքում իմ դռները միշտ բաց են եղել ձեր առջև և առանց արհեստական խոչընդոտի շփվել ենք, ինչպես օնլայն հարթակում, այնպես էլ տետ ա տետ: Ես վստահ եմ` մենք կարողացանք միասին աշխատել, որովհետև իրար խաբելու, վախենալու կամ ավելի լավը երևալու միտում երբեք չենք ունեցել: Մենք այն ենք, ինչ կանք` պարզ, հասարակ, կամեցող: Պարզապես ուզում եմ, որ հետայսու նույնպես այս լավ ու բարի մթնոլորտը շարունակվի` ի նպաստ մեր սիրելի վարչական շրջանի»,-ասվում է Դավիթ Գրիգորյանի գրառման մեջ։

Դավիթ Գրիգորյանը հույս է հայտնել, որ նոր ղեկավարը բնակիչների հետ միասին պատրաստ կլինի կիսելու վարչական շրջանի հոգսերը, իսկ բնակիչներն իրենց հերթին պատրաստակամություն կհայտնեն օգնելու՝ ավելի լավ էրեբունի կառուցելու գործում:

Դավիթ Գրիգորյանը ՀՀԿ անդամ է: