Ամերիկահայ բարերարն առաջարկում է ԱՄՆ բժշկական չափորոշիչներ ներդնել ՀՀ-ում

PanARMENIAN.Net - Ամերիկյան Prime Healthcare ընկերության նախագահ, ամերիկահայ բարերար Մայք Սարյանը, որն ԱՄՆ առողջապահական ոլորտի հայտնի ներկայացուցիչ է և ԱՄՆ 14 նահանգների 45 հիվանդանոց ներառող խոշոր ցանցի ղեկավար, իր աջակցությունն է առաջրակում ԱՄՆ առողջապահական համակարգում կիրառվող բժշկական չափորոշիչները Հայաստանում ներդնելու ու դրանցով առաջնորդվելու հարցում: Այդ մասին նա ասել է առողջապահության նախարարի պաշտոնակատար Արսեն Թորոսյանի հետ հանդիպմանը:

Վարչապետի պաշտոնակատար Նիկոլ Փաշինյանի հետ հանդիպման ընթացքում պայմանավորվածություն էր ձեռք բերվել Սարյանի առաջարկած մի շարք գաղափարներ և համատեղ նախագծեր առավել առարկայորեն քննարկել արդեն առողջապահական գերատեսչությունում:

«Առողջապահության ոլորտում հեղափոխություն անելու հարցում Ձեր կողքին ենք»,-շեշտել է Սարյանը՝ նշելով, որ այդ չափորոշիչները վերաբերում են թե առողջապահական հաստատությունների շենքային պայմաններին, թե բուժման ընդհանուր գործընթացներին:

Ամերիկահայ բարերարը հետաքրքրված է նաև ամերիկյան արտադրության բժշկական նշանակության ապրանքներ, դեղեր բերելու, Հայաստանում փաթեթավորելու, վերավաճառելու ու արտահանելու հարցում: «Ինձ համար երազանք է` Հայաստանում հիմնել լավագույն չափորոշիչներին համապատասխան, առաջատար գիտելիքահեն բուժկենտրոն` այսպիսով նպաստելով նաև առողջապահական տուրիզմի զարգացմանը»,-ասել է Սարյանը` վստահեցնելով, որ պատրաստ է իր նպաստը բերել համակարգի զարգացմանն ու այս գաղափարին:

Սարյանին հետաքրքրել են Թորոսյանի դիտարկումներն ու իր գաղափարները կյանքի կոչելու առաջարկները: Հայաստան այցի շրջանակում առաջիկա օրերին արդեն որոշակի քննարկումներ և այցեր կկազմակերպվեն: Հայ բարերարը հետաքրքրվել է նաև այս սեպտեմբերին Հայաստանին նվիրաբերված մեծաքանակ բուժտեխնիկայի և օժանդակ սարքավորումների բաշխման գործընթացով` տեղեկանալով, որ օրերս արդեն դրանք կտրամադրվեն հիմնականում մարզային բուժհաստատություններին:

Հայաստանյան առողջապահական համակարգին շարունակական աջակցության, ինչպես նաև կառավարման գործում նշանակալի ավանդի համար նախարարի պաշտոնակատարի անունից Մայք Սարյանին հայտարարվել է շնորհակալություն, իսկ բարերարը պարգևատրվել է նաև նախարարության հուշամեդալով: