ԻՍՐԱՅԵԼԻ ՀԱՅՈՑ ՊԱՏՐԻԱՐՔԱՐԱՆԻ ՀՈՂԵՐԻ ՕՏԱՐՄԱՆ ՄԱՍԻՆ ԳՈՐԾՈՒՄ ԴԵՌԵՎՍ ԿԱՆ ՈՐՈՇ ԲԱՐԴՈՒԹՅՈՒՆՆԵՐ

PanARMENIAN.Net - Իսրայելի բարձրագույն իրավական դատարանը դեռեւս որոշում չի կայացրել Իսրայելի եւ Պաղեստինի միջեւ բաժանող պատի կառուցման նպատակով Երուսաղեմի Հայոց Պատրիարքարանի հողերի օտարման հարցի վերաբերյալ, քանի որ Պատրիարքարանի եւ Իսրայելի պաշտպանության ուժերի ղեկավարության միջեւ բանակցությունները դեռ շարունակվում են: Այդ մասին հաղորդել է Երուսաղեմի Հայոց Պատրիարք Թորգոմ Մանուկյանը օրերս Ամերիկայի hայկական hամագումարին: Նրա խոսքերով, Իսրայելի պաշտպանության ուժերը համաձայնվել են տեղափոխել պարիսպը, որպեսզի այն անցնի կալվածքի հարավային եզրագծով, եւ ոչ թե կալվածքի միջով, ինչպես ի սկզբանե պլանավորված էր: Սակայն դեռ կան բարդություններ, եւ դրանք ներկայումս քննարկվում են: Հարցն այժմ հետեւյալն է. «քչացնել պարիսպի համար անհրաժեշտ հողատարածքի լայնքը» եւ պահանջել փոխհատուցում` Իսրայելի պաշտպանության ուժերի հարձակումների ժամանակ կալվածքին հասցրած վնասի համար: Պատրիարքը հույս է հայտնել, որ հարցն արդարացի լուծում կստանա, սակայն զգուշացրել է, որ բանակցությունները զգայուն փուլում են: