ՀԾԿՀ-ում կքննվի համար խմելու ջրի սակագինը բարձրացնելու հարցը

PanARMENIAN.Net - Հանրային ծառայությունները կարգավորող հանձնաժողովը (ՀԾԿՀ) կքննի է 1 խորանարդ մետր խմելու ջրի սակագինը գործող 191-ի փոխարեն 2019-ի համար 202 դրամ սահմանելու հարցը։

Հանրային ծառայությունները կարգավորող հանձնաժողովում «Վեոլիա Ջուր» ՓԲԸ-ի ներկայացրած սակագների վերանայման (ճշգրտման) հայտի շրջանակում իրականացված մանրածախ ջրամատակարարման ծավալների մոնիթորինգի և խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման սակագների սահմանման հարցերի շուրջ նոյեմբերի 19-ին տեղի է ունեցել աշխատանքային քննարկում:

Մասնակիցներին ներկայացվել են «Վեոլիա Ջուր» ՓԲԸ-ի կողմից խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման սակագների ձևավորման սկզբունքները, 2018թ-ի օգոստոսին ստացված հայտի ուսումնասիրության շրջանակներում իրականացված մոնիթորինգի արդյունքները և 2019թ-ի համար հաշվարկված սակագների մեծությունները (գումարային մանրածախ սակագինը՝ 202,272 դրամ/խմ՝ ներառյալ ԱԱՀ-ն):

Հանդիպմանը մասնակցել են ՀՀ էներգետիկ ենթակառուցվածքների և բնական պաշարների նախարարության ջրային կոմիտեի, «Վեոլիա Ջուր» ՓԲԸ-ի լիազորված անձինք, ՀՀ էներգետիկ ենթակառուցվածքների և բնական պաշարների փոխնախարարը, «Սպառողների աջակցման կենտրոն», «Սպառողների ասոցիացիա» Հ/Կ-ների ներկայացուցիչները:

Հանդիպումն անցել է աշխատանքային, ակտիվ քննարկումների մթնոլորտում. մասնակիցների կողմից հնչել են բազմաթիվ հարցեր, տրվել համապատասխան պարզաբանումներ:

«Վեոլիա Ջուրը» Հանրային ծառայությունները կարգավորող հանձնաժողով էր դիմել դեռ օգոստոսին և առաջարկում էր 2019-ի հունվարի 1-ից 1 խորանարդ մետր խմելու ջրի համար սահմանել 205 դրամ սակագին։