Ադրբեջանում ՌԴ դեսպան. ՌԴ-ն կշարունակի աջակցել ԼՂ կարգավորմանը

PanARMENIAN.Net - Ռուսաստանը կշարունակի աջակցել ԼՂ հիմնախնդրի կարգավորմանը: Այդ մասին հայտարարել է Ադրբեջանում ՌԴ դեսպան Միխայիլ Բոչարնիկովը՝ հավելելով, որ զգուշավոր լավատեսությամբ է գնահատում ղարաբաղյան հակամարտության կարգավորման շուրջ բանակցային գործընթացը:

«Ես զգուշավոր լավատես եմ այն առումով, որ բարենպաստ մթնոլորտ է ստեղծված բանակցային գործընթացի համար: Կարծում եմ, որ անցնող տարին անարդյունք չի եղել»,-ասել է Բոչարնիկովը Բաքվում մամուլի ասուլիսի ժամանակ, հայտնում է Interfax-ը:

Նա նշել է, որ 2018-ին «հիմք է դրվել, տեղի են ունեցել հակամարտության կողմերի, Ադրբեջանի և Հայաստանի ԱԳՆ ղեկավարների հանդիպումներ»:

«Ինչպես հայտարարել էր պարոն Մամեդյարովը, 2019-ի հունվարին նախատեսվում է երկու նախարարների հանդիպում: Ռուսաստանում ողջունում են առկա միտումը: Կշարունակենք աջակցել այդպիսի մթնոլորտի ձևավորմանը»,-ասել է նա:

ՀՀ վարչապետի պաշտոնակատար Նիկոլ Փաշինյանը լրագրողների հետ զրույցում հայտնել է, որ Ադրբեջանն ի սկզբանե մերժել է Սանկտ Պետերբուրգի և Վիեննայի պայմանավորվածությունները:«Ամբողջ խնդիրն այն է, որ Ադրբեջանը պնդել է՝ նման պայմանավորվածություններ ընդհանրապես չկան: Ես ուզում եմ բոլորի ուշադրությունը հրավիրել այն փաստի վրա, որ ես՝ որպես երկրի ղեկավար պաշտոնական բանակցային որևէ գործընթացի դեռևս չեմ մասնակցել», - ասել է նա՝ հավելելով, որ ընդամենը երկու անգամ ինքը զրույց է ունեցել Ադրբեջանի նախագահի հետ:

2016 մայիսին Վիեննայում Ադրբեջանի և Հայաստանի նախագաներ Իլհամ Ալիևը և Սերժ Սարգսյանը որոշել էին շփման գծում մշտադիտարկման և միջադեպերի հետաքննության մեխանիզմներ ներդնել: