Վարչապետի 15 հանձնարարականը՝ տնտեսական հեղափոխության մեկնարկին

PanARMENIAN.Net - ՀՀ վարչապետ Նիկոլ Փաշինյանը կառավարության փետրվարի 15-ի նիստը սկսել է տնտեսական հեղափոխության իրականացման համար մի շարք հանձնարարականներով:

1. Նա հանձնարարել է վերանայել մինչև այժմ ներկայացված բոլոր ներդրումային առաջարկները, գույքագրել դրանցից յուրաքանչյուրի ընթացքը, բացահայտել խնդիրները, կենտրոնացնել ամբողջ տեղեկատվությունը ՀՀ տնտեսական զարգացման և ներդրումների նախարարությունում:

2. Կարգավորումների պարզեցման ճանապարհային քարտեզ կազմել, այդ թվում՝ ջրի, գազի, էլէկտրական էներգիայի կանխատեսելի հասանելիության խնդիրը լուծելու նպատակով:

3. Արագացնել ներդրումային հայկական հիմնադրամի ստեղծման աշխատանքները, որը կիրականացնի ներդրումային ծրագրերի ուղեկցումը:

4. Մշակել մեխանիզմ, որ սեզոնային ժամանակավոր աշխատանքի ընդունվելու պարագայում ՀՀ քաղաքացին չզրկվի ընտանեկան կամ սոցիալական նպաստից:

5. Հաշվառել ՀՀ-ում առկա բոլոր թափուր աշխատատեղերը՝ աշխատավարձերով, հասցեներով, ընկերություններով:

6. Արագ բացահայտել այն բոլոր մարդկանց, ովքեր ամսական 100,000 դրամ և ավելի վարկեր են սպասարկում և միևնույն ժամանակ օգտվում են սոցիալական կամ ընտանեկան նպաստներից:

7. Բանկային տոկոսադրույքների նվազեցման հարցը պահել օրակարգում և ռազմավարություն մշակել այդ ուղղությամբ:

8. Միկրոբիզնեսը, անասպանահությունը վարկավորելու գործուն մեխանիզմներ մշակել:

9. Մեծ թափով սկսկել վերամասնագիտացման ուսումնական կենտրոնների ստեղծումը, և վերամասնագիտացման ծառայություններ մատուցել աշխատաշուկայի պահանջներին համապատասխան:

10. Ակտիվացնել և զարգացնել բոլոր այն կենտրոններն ու նախագծերը, որոնց նպատակը մարդկանց բիզնես հմտությունները զարգացնելն է, մարդկանց ֆինանսական գրագիտությունը շարունակական բարձրացնելն է, այս նպատակով գործակցել հեռուստաընկերությունների հետ:

11. Ակտիվացել մասնավոր հատվածի ներգրավումը միջին մասնագիտացման կրթական հաստատությունների վերակենդանացման և զարգացման գործում:

12. Կաթիլային ոռոգման, հակակարկտային ցանցերի և գյուղատնտեսական նոր տեխնոլոգիաների ներդրման բյուջետային ծրագրերի արդյունավետությունը բարձրացնել այնպես, որ բյուջեով նախատեսված ծրարգրերն ամբողջությամբ իրականանան, նախադրյալներ ստեղծել դրանց ծավալները մեծացնելու համար:

13.Ջրամբարաշինության և ճանապարհաշինության առկա նախագծերի գույքագրում իրականացնել և նոր նախագծեր իրականացնել՝ զուգահեռաբար գործակցելով հնարավոր դոնոր ընկերությունների հետ:

14. Մսի և կենդանի գլխաքանակի արտահանման մեխանիզմների գույքագրում իրականացնել և աջակցել գործընթացին:

15. Պատրաստվել պտուղ-բանջարեղենի սեզոնին, համոզվել գործող մեխանիզմների գործունակության մեջ, և նոր պոտենցիալ արտահանողների համար գործուն մեխանիզմներ ստեղծել: