Մարտի 1-ի դեպքերից 11 տարի է անցել

1 մարտի 2019 - 10:36 AMT

PanARMENIAN.Net - Մարտի 1-ի դեպքերից 11 տարի է անցել: Այդ օրը Երևանում ՀՀ 10 քաղաքացի է զոհվել, վիրավորվել ավելի քան 200 հոգի:

2008-ի փետրվար ամսվա վերջին, ՀՀ նախագահի փետրվարի 19 ընտրությունների արդյունքներից դժգոհ քաղաքացիները՝ ՀՀ առաջին նախագահ Լևոն Տեր-Պետրոսյանի գլխավորությամբ հանրահավաքներ ու նստացույց էին անցկացնում Ազատության հրապարակում: Մարտի 1-ի վաղ առավոտյան ոստիկանության աշխատակիցները Ազատության հրապարակում զենք, զինամթերք և մոլոտովյան կոկտեյլներ հայտնաբերելու պատրվակով ներխուժեցին հրապարակ, հարձակվեցին ցուցարարների վրա և ուժով ցրեցին նրանց:

Ժամեր անց ցուցարարները հավաքվեցին Մյասնիկյանի արձանին հարող հրապարակում՝ Ֆրանսիայի և Ռուսաստանի դեսպանատների առաջ, և սկսվեց ինքնաբուխ հանրահավաք։ Ավելի ուշ հայտարարվեց պարետային ժամ, մայրաքաղաք մտցվեցին բանակային ստորաբաժանումներ: Բախումների արդյունքում զոհվեց տասը մարդ:

Մարտի 1-ի իրադարձություններից 10 տարի անց` 2018 թվականին, գործը վերաբացվել է. առաջին անգամ ի հայտ եկան մեղադրյալներ: Նրանց թվում են ՀՀ երկրորդ նախագահ Ռոբերտ Քոչարյանը, ՀՀ պաշտպանության նախկին նախարարներ Միքայել Հարությունյանը և Սեյրան Օհանյանը, ՀԱՊԿ նախկին գլխավոր քարտուղար Յուրի Խաչատուրովը:

Նրանք մեղադրվում են քաղաքական գործընթացներին ՀՀ զինված ուժերի ներգրավմամբ Սահմանադրական կարգը տապալելու մեջ:

Գործով մեղադրանք է առաջադրվել ՀՀ նախկին փոխվարչապետ Արմեն Գևորգյանին 2008 թվականի նախագահական ընտրությունների արդյունքները չվիճարկելու համար Սահմանադրական դատարանի դատավորի նկատմամբ ճնշումներ բանեցնելու մեղադրանքով:

Մարտի 1-ի քրեական գործով կարևոր ապացույցներ կոծկելու համար մեղադրվում է ՀՔԾ նախկին պետ Վահագն Հարությունյանը:

Գործի նախաքննությունն ավարտվել է և ուղարկվել է ՀՀ գլխավոր դատախազություն: