«Լուսավոր Հայաստանը»՝ կառավարությանը. Ի՞նչ սկզբունքով եք կրճատումներ անելու

PanARMENIAN.Net - ԱԺ «Լուսավոր Հայաստան» խմբակցությունը հարցապնդմամբ դիմել է ՀՀ կառավարությանը՝ կառավարության կազմում տեղի ունեցող կրճատումների հետ կապված խնդիրների կապակցությամբ։ Այդ մասին իր ֆեյսբուքյան էջում հայտնել է խմբակցության ղեկավար Էդմոն Մարուքյանը:

Խմբակցությունը կառավարությանը հետևյալ հարցերն է ուղղել.

- ո՞րն է կառավարության տեսլականն իր կազմում կատարվող փոփոխությունների հետ կապված

- որո՞նք են կրճատվող ԾԻԳ-երը և ՊՈԱԿ-ները

- ի՞նչ սկզբունքով են կատարվելու հաստիքների և աշխատակիցների կրճատումները և արդյո՞ք կառավարությունը պատրաստ է առերեսվել կրճատված կադրերի գործազրկության խնդրի հետ

- ի՞նչ սկզբունքով է չափվելու կրճատվող և տեղում մնացող աշխատակիցների աշխատանքի արդյունավետությունը

- և վերջապես, որքանո՞վ կբարձրանան պետական հատվածի աշխատավարձերը, նպաստները և/կամ կենսաթոշակներն ազատված միջոցների հաշվին:

Հարցապնդման պատասխանը կքննարկվի ԱԺ ընդլայնված նիստում։

Կառավարության գործունեության և կառուցվածքի մասին օրենքում կատարվող փոփոխություններով՝ նախարարությունների թիվը 17-ից կրճատվել է 12-ի: Խոսվում է մոտ 10,000 մարդ կրճատելու մասին: Մարզպետարաններում նախատեսվում է աշխատակազմերի մինչև 30 %-ը կրճատել: