Ստամբուլում Հայոց ցեղասպանության ոգեկոչման արարողությունն արգելել են

PanARMENIAN.Net - Ստամբուլի նահանգապետարանը չի թույլատրել Սուլթանահմետ հրապարակում ապրիլի 24-ին նախատեսված` Հայոց ցեղասպանության զոհերի ոգեկոչման արարողության անցկացումը:

Ավելի վաղ հայտարարվել էր, որ միջոցառումն անցկացվելու է ժամը 12-ին Սուլթանահմեթ հրապարակում գտնվող Թուրքական և իսլամական արվեստի թանգարանի շենքի առջև: Ըստ հայտարարության՝ 1915թ այդ շենքը բանտ է եղել և Ստամբուլի հայերը մինչև աքսորվելը պահվել են այնտեղ:

Մարդու իրավունքների պաշտպանի` Ստամբուլի գրասենյակի ռասիզմի և խտրականության դեմ հանձնաժողովը Հայոց ցեղասպանության տարելիցի կապակցությամբ Սուլթանահմետ հրապարակում պետք է արարողություն կազմակերպեր: Ոստիկանությունը ցույցի մասնակիցներին, որոնց թվում էր նաև քրդամետ Ժողովուրդների դեմոկրատական կուսակցության հայազգի պատգամավոր Կարո Փայլանը, զգուշացրել է, որ նահանգապետարանը չի թույլատրում ցույցերի անցկացումը, հայտնում է Yerkir.am-ը gazeteduvar.com.tr կայքի վրա հղումով:

Ֆրանսիայից եկած պատգամավորներն ու Փայլանը լքել են հրապարակը և մոտակա ժամերին հայտարարություն կանեն:

Ավելի վաղ հայտարարվել էր, որ Թուրքիայի Ստամբուլ քաղաքում ապրիլի 24-ին Հայոց ցեղասպանության անմեղ զոհերի հիշատակին նվիրված 2 միջոցառում կանցկացվի:

Ընթերցեք նաև.Թուրք ազգայնական գործիչ. Հայոց ցեղասպանություն չկա, բայց չի նշանակում, որ չի էլ լինելու