Առողջապահության նախկին փոխնախարարը 15 մլն դրամ գրավի դիմաց ազատ կարձակվի

8 հուլիսի 2019 - 15:46 AMT

PanARMENIAN.Net - Առողջապահության նախկին փոխնախարար Արսեն Դավթյանը 15 մլն դրամ գրավի դիմաց ազատ կարձակվի:

Երևան քաղաքի ընդհանուր իրավասության առաջին ատյանի դատարանը (նախագահությամբ Ա. Մաթևոսյանի) բավարարել է «Ղազարյան ընդ Փարթնըրս» գրասենյակի փաստաբաններ Տիգրան Ղազարյանի և Երեմ Դավթյանի՝ ՀՀ Առողջապահության նախկին փոխնախարար Արսեն Դավթյանի նկատմամբ ընտրված կալանքը գրավով փոխարինելու վերաբերյալ միջնորդությունը: Այդ մաիսն ասվում է տեղեկացնում են «Ղազարյան ընդ Փարթնըրս» փաստաբանական գրասենյակի հաղորդագրության մեջ:

Սահմանված չափով գումարը վճարելուց և դրա մասին ապացույցը վարույթն իրականացնող մարմին ներկայացնելուց հետո Արսեն Դավթյանը կազատվի կալանքից:

Փոխնախարարը մեղադրվում է առանձնապես խոշոր չափերով կաշառք ստանալու մեջ:

Ավելի վաղ հայտնի դարձավ, որ ԱԱԾ-ի կողմից ձեռնարկված օպերատիվ հետախուզական միջոցառումների շրջանակում քննչական գործողությունների արդյունքում ձեռք են բերվել փաստական տվյալներ այն մասին, որ բժշկական հաստատության տնօրենը նպատակ է ունեցել ապահովել առողջապահության նախարարության կողմից բուժհաստատություններին տրամադրվող ֆինանսավորման աշխատանքները համակարգող փոխնախարարի հովանավորչությունը և նրա հետ ձևավորել իր համար բարենպաստ աշխատանքային պայմաններ:

Վերաբաշխման արդյունքում պետպատվերի շրջանակներում տարբեր ծրագրերով հատկացվելիք գումարներով կազմակերպության ֆինանսավորման պակասը լրացնելու համար 2019 թվականի մարտի 30-ին առողջապահության նախարարի տեղակալ Արսեն Դավթյանին վերջինիս աշխատասենյակում որպես կաշառք անձամբ տվել է առանձնապես խոշոր չափերով գումար, որի փոխանցումն իրականացվել է ՀՀ ԱԱԾ աշխատակիցների օպերատիվ վերահսկողության ներքո: