Իրանը խոշորացնում է ռիալն ու անվանափոխում արժույթը

PanARMENIAN.Net - Իրանի կառավարությունը հավանություն է տվել ռիալի խոշորացման և վերանվանման ծրագրին: Դա հաստատել է երկրի Կենտրոնական բանկի ղեկավար Աբդոլնասեր Հեմաթին: Նա էր 2019-ի հունվարին առաջարկել 4 զրո հեռացնել իրանական արժույթից:

«Այսօր նախարարների կաբինետը որոշել է 4 զրո հեռացնել մեր արժույթից և վերանվանել այն թուման»,-ասել է լրագրողներին Իրանի կառավարության ներկայացուցիչ Ալի Ռաբիյան, գրում է BBC-ին:

Այդ քայլը պայմանավորված է լուրջ տնտեսական դժվարություններով և դրամական փոխհաշվարկները հեշտացնելու անհրաժեշտությամբ: Նախարարների կաբինետն իր որոշմամբ, որը դեռ պետք է հավանություն ստանա խորհրդարանում, փաստացի խոստովանել է, որ դրամական բարեփոխում է հասունացել: «Դա կրկին արդյունավետ կդարձնի ազգային արժեքը, կրկին շրջանառության մեջ կդրվեն մետաղադրամներ,-ասել է Ռաբիյան:

Թումանը եղել է Իրանի ազգային արժույթը մինչ 1932-ի բարեփոխումը:

Իրանի ռիալը սկսել է կտրուկ արժեզրկվել 2018-ից: Եթե 3 տարի առաջ փոխարժեքը կազմել է 37,000 1 դոլարի հարաբերակցությամբ, ապա 2018-ին իրանական արժույթը սակարկվում էր 180,000 ռիալ 1 դոլարի դիմաց հարաբերակցությամբ: Դա տեղի ունեցավ, երբ ԱՄՆ նախագահ Թրամփը հայտարարեց, որ ԱՄՆ-ն դուրս է գալիս Իրանի հետ միջուկային համաձայնագրից և վերագործարկեց Թեհրանի դեմ պատժամիջոցները: Այժմ իրանական արժույթի շուկայական փոխարժեքը տատանվում է 1 դոլարի դիմաց 120,000 ռիալի սահմանում, իսկ Իրանի կառավարության փոխարժեքն է 42,000 ռիալ 1 դոլարի դիմաց: