Լարսում մնացած ՀՀ քաղաքացիները տեղափոխվել են Հայաստան

PanARMENIAN.Net - Վերին Լարսի ռուսական հատվածում օրեր շարունակ գտնվող ՀՀ 140 քաղաքացին Հայաստան են տեղափոխվել 5 ավտոբուսով և 4 միկրոավտոբուսով: Դա հնարավոր է դարձել Վրաստանի իշխանությունների հետ բանակցությունների արդյունքում՝ այդ երկրի տարածքով միջանցք է տրամադրվել։ Այս մասին ֆեյսբուքյան իր էջում տեղեկացրել է Վրաստանում ՀՀ դեսպանությունը:

«Վրաստանում ՀՀ դեսպանությունը համակարգել է Վրաստանի տարածքում ՀՀ քաղաքացիների դիմավորման և մինչև Բագրատաշենի անցակետ տեղափոխման աշխատանքները։ Նրանց տրամադրել է ուտելիք և առաջին անհրաժեշտության պարագաներ, ինչպես նաև ապահովել է Վրաստանի տարածքում ՀՀ քաղաքացիների մեկանգամյա կանգառի ախտահանման աշխատանքները։

Ընդգծենք, որ այս տեղափոխությունը կատարվել է բացառության կարգով»,- ասվում է գրառման մեջ։

Մարտի 22-ի պաշտոնական տեղեկատվության համաձայն, Վրաստանում կորոնավիրուսով վարակված է 54 մարդ, առողջացած են համարվում արդեն 3-ը: Այս մասին ասվում է կառավարության կողմից ստեղծված կայքէջում:

ՀՀ-ում մարտի 16-ից մինչև ապրիլի 14-ն արտակարգ դրություն է՝ կորոնավիրուսի տարածումը կանխելու համար: Մարտի 22-ի առավոտվա դրությամբ երկրում վարակի 190 հաստատված դեպք կա, 2-ն առողջացել է: Մահվան ելքով դեպքեր չկան:

Առողջապահության նախարարությունում գործում է շուրջօրյա «թեժ գիծ» ծառայություն 8003 և «օպերատիվ զանգերի կենտրոն» 060838300 հեռախոսահամարներով:

Ընթերցեք նաև․ Կորոնավիրուսից խուսափելու համար խորհուրդներ` ԱՀԿ-ից