ԱԺ-ն չի ընդունել հիվանդներին ու մեկուսացածներին հեռախոսի լոկացիայով հետևելու օրենքը

PanARMENIAN.Net - Ազգային ժողովը չի կարողացել երկրորդ ընթերցմամբ ընդունել «Արտակարգ դրության իրավական ռեժիմի մասին» օրենքում լրացումներ կատարելու մասին» և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը, որը նախատեսում էր կորոնավիրուսով հիվանդների ու մեկուսացածների տեղաշարժի մասին տեղեկատվության ստացում հեռախոսների միջոցով։

ԼՀԿ խմբակցության ղեկավար Էդմոն Մարուքյանը կոչ է արել ԲՀԿ-ին չմասնակցել քվեարկությանը:

Արդյունքում կողմ է քվեարկել 65 պատգամավոր, ձեռնպահ և դեմ՝ զրոական, նախագծերի փաթեթը չի ընդունվել՝ ոչ բավարար ձայների արդյունքում։ Նախագիծն անցկացնելու համար պետք էր առնվազն 67 ձայն::

88-հոգանոց «Իմ քայլի» մի քանի պատգամավոր ներկա չի եղել քվեարկությանը, արդյունքում խմբակցությունն ուներ 65 ձայն։ ԼՀԿ-ն ու ԲՀԿ-ն չեն մասնակցել քվեարկությանը, ինչի արդյունքում անհրաժեշտ քանակի ձայներ չեն հավաքվել:

Փոփոխությունները հնարավորություն են տալու կորոնավիրուսով հիվանդների ու մեկուսացման մեջ գտնվողների տեղաշարժին հեռախոսների միջոցով հետևելու ու այդկերպ պարզելու նրանց շփման շրջանակը։

Ըստ փոփոխության՝ օպերատորները պետք է պետությանը տրամադրեն հաճախորդին տեղորոշող տվյալներն ու նրա կատարած զանգերի սկզբի, ավարտի ու հնարավոր վերահասցեագրման (ոչ զանգերի բովանդակության) տվյալները։