Շվեդական ռեստորան՝ մեկ հոգու համար

PanARMENIAN.Net - Մայիսի 10-ին Շվեդիայում կբացվի Bord för En (շվեդերենից թարգմանաբար՝ «սեղան մեկի համար») ոչ սովորական ռեստորանը։ Այն տեղակայված է շվեդական Ռանսեթեր քաղաքին հարակից մարգագետնում և, ըստ կոնցեպտի` կարող է օրը միայն մեկ հաճախորդի ընդունել, փոխանցում է CNN-ը:

Նախագծի հեղինակները Լինդա Կարլսոնը և Ռասմուս Փերսսոնն են, որոնց մոտ ռեստորանի միտքը ծագել է՝ տարեց ծնողների անակնկալ այցից հետո։ Զույգը որոշել է հետևել սոցիալական հեռավորություն պահելու բոլոր կանոններին՝ տարեց հարազատների առողջությունը պահպանելու համար, իսկ նախկին շեֆ խոհարար Փերսսոնը պատրաստած ուտեստները պատուհանից փոխանցել է հարազատներին։

Բաց դաշտի մեջ գտնվող ռեստորանում կա մեկ ճաշասեղան ու աթոռ, և չկա մատուցող․ ուտեստը խոհանոցից այցելուի սեղանին է հասնում պարանին կապված զամբյուղով։

Զույգը պլանավորում է ռեստորանն աշխատեցնել մինչև օգոստոսի 1-ը։ Նրանք այցելուներին սպասում են՝ անկախ ֆինանսական կարգավիճակից․ հյուրերը կարող են վճարել այնքան, որքան անհրաժեշտ կհամարեն։

Ի տարբերություն Եվրամիության այլ երկրների՝ Շվեդիան կորոնավիրուսի տարաումը կանխելու համար խիստ սահմանափակումների չի գնացել։ Մարտի 27-ից հանրային միջոցառումներին կարող էին հավաքվել մինչև 50 հոգի, փակվել են գրեթե բոլոր կինոթատրոնները, թանգարանները և թատրոնները, չեղարկվել են սպորտային միջոցառումները։ Երկրում մայիսի 1-ի դրությամբ 21,000-ից ավելի վարակված կա, մահացել է 2653 մարդ։