Նախարար․ ՏԻՄ-երը հետևելու են բազմամարդ հավաքների անցկացմանը

PanARMENIAN.Net - Տարածքային և տեղական ինքնակառավարման մարմիններին հանձնարարվել է պարետի որոշումների իրագործողներ դառնալ՝՝ կապված բազմամարդ հավաքույթների, սգո արարողությունների հետ, հայտնել է Տարածքային կառավարման և ենթակառուցվածքների նախարար Սուրեն Պապիկյանը։

Նա նշել է, որ ՀՀ-ում վարակի տարածման համար շարունակում է մեծ խնդիր լինել սգո արարողությունները, բազմամարդ հավաքույթները։

«Յուրաքանչյուրիս գործողությամբ կարող են փրկվել կյանքեր, իսկ անգործությամբ՝ արձանագրվել մահեր»,- ասել է նախարարը։

Պապիկյանը նշել է, որ էական չէ, թե հանգուցյալն ինչից է մահացել, այդտեղ հավաքված մարդիկ կարող են վարակակրի հետ շփվել ու հետագայում դառնալ վիրուսակիր։

Նա հորդորել է քաղաքացիներին հետևել ՏԻՄ ղեկավարների և մյուս պատասխանատուների ցուցումներին։ Նախարարը խնդրել է ծննդյան, հարսանիքի կամ մեկ այլ բազմամարդ միջոցառում անցկացնելիս հետևել պարետատան սահմանած կարգին, այլ ոչ թե անել դա ծածուկ։

Հայաստանում հունիսի 11-ի դրությամբ կորոնավիրուսով վարակի դեպքերը հասել են 14,669-ի։ Ընդհանուր առմամբ, կորոնավիրուսից մահվան 245 դեպք կա, այլ պատճառով՝ 82։ Առողջացածների ընդհանուր թիվը 5466 է։