Պետգույքի կոմիտե․ Վաճառքի հանված Նորքի այգիներն անտառածածկ չեն

PanARMENIAN.Net - Նորքի այգիներում վաճառքի հանված տարածքն անտառածածկ չէ, այն նախկինում մանկական առողջարանի տարածք է եղել, իսկ դրա գործունեության դադարեցումից հետո տարածքում գտնվում են կիսաքանդ շենք-շինություններ և մեծ քանակությամբ շինաղբ, PanARMENIAN.Net ին ասացին Պետական գույքի կառավարման կոմիտեից։

«Մենք բոլոր շահագրգիռ կողմերին պատրաստ ենք տեղում իրավիճակին ծանոթանալու հրավիրել»,- նշեցին Կոմիտեից՝ անդրադառնալով վաճառքի հանված տարածքի բնապահպանական նշանակությանը։

Օգոստոսի 3-ին ԵՊՀ ուսանողների հետ տարվող աշխատանքների կենտրոնի տնօրեն Վահագն Վարագյանը ֆեյսբուքյան իր էջում մտահոգություն էր հայտնել, թե Նորքի այգիների վաճառքով Երևանին բնապահանական վնաս կհասցվի, իսկ երևանցիները «կմոռանան մաքուր օդ շնչելու մասին»։

Նորքի այգիները Պետգույքի կոմիտեն վաճառքի է հանել հուլիսի սկզբին, մրցույթի վերջնաժամկետն օգոստոսի 7-ն է։ Վաճառքի մեկնարկային գինը 1․5 մլրդ դրամից ավելի է կազմում, այն ներառում է 1․84 հա մակերեսով հողատարածք և 2018․12 քմ շինություն։