ԲՀԿ․ Փաշինյանի հետ կհանդիպենք բացառապես իր անցնցում հրաժարականի օրակարգով

PanARMENIAN.Net - Վարչապետ Նիկոլ Փաշինյանն առաջարկել է հանդիպում խորհրդարանական քաղաքական ուժերի հետ, սակայն «Բարգավաճ Հայաստանը» կանի դա միմիայն վարչապետի հրաժարականի օրակարգով, հայտնում են կուսակցությունից:

«Այսօր «Բարգավաճ Հայաստան» խորհրդարանական խմբակցությունը հայտարարում է. Նիկոլ Փաշինյանի հետ հանդիպումը կարող է կայանալ միմիայն և բացառապես մեկ օրակարգով՝ իր անցնցում հրաժարականի», - ասված է ԲՀԿ հաղորդագրության մեջ։

ԲՀԿ-ից նշել են, որ իրենք ու «Լուսավոր Հայաստան» կուսակցությունը մի քանի անգամ պաշտոնապես դիմել են Նիկոլ Փաշինյանին՝ առաջարկելով օր առաջ կազմակերպել հանդիպում քաղաքական ուժերի հետ, ինչը Փաշինյանը մերժել է:

Նոյեմբերի 16-ին վարչապետը հայտնել էր, թե հրաժարականի հարց իր օրակարգում չկա։

Սեպտեմբերի 27-ից Արցախի դեմ Ադրբեջանը պատերազմ էր սանձազերծել՝ ահաբեկիչ-վարձկանների ու թուրքերի անմիջական աջակցությամբ։ Նոյեմբերի 10-ին վարչապետ Նիկոլ Փաշինյանը հայտարարեց, որ ՌԴ ու Ադրբեջանի նախագահների հետ պատերազմի դադարեցման համաձայնություն կա։ Ըստ դրա՝ Ադրբեջանը և Հայաստանը կանգ են առնում իրենց զբաղեցրած դիրքերում: Իսկ ՌԴ խաղաղապահները տեղակայվում են ԼՂ շփման գծի երկայնքում և Հայաստանի հետ կապող միջանցքում: Դրանից հետո հայաստանյան ընդդիմադիրները բողոքի ակցիաներ ու ցույցեր էին կազմակերպում՝ պահանջելով վարչապետի հրաժարականը։