Լավրովն ու Զարիֆը քննարկել են իրավիճակն Արցախում

PanARMENIAN.Net - ՌԴ ԱԳ նախարար Սերգեյ Լավրովը և Իրանի արտգործնախարար Մոհամմեդ Ջավադ Զարիֆը հեռախոսազրույցի ընթացքում քննարկել են իրավիճակն Արցախում։

Քննարկվել է ընթացիկ իրավիճակը Լեռնային Ղարաբաղում՝ հաշվի առնելով հակամարտության գոտու հրադադարի լիակատար հաստատմանն ուղղված ռուսական կողմի ջանքերը, ինչպես նաև հումանիտար աջակցության անհրաժեշտությունը մարտական գործողությունների հետևանքով տուժած քաղաքացիական բնակչությանը, գրում է ՏԱՍՍ-ը։

ԱԳ նախարարները քննարկել են նաև այլ առանցքային թեմաներ, այդ թվում՝ իրավիճակը Սիրիայում, Պարսից ծոցում։

Սեպտեմբերի 27-ից Արցախի դեմ Ադրբեջանը պատերազմ էր սանձազերծել՝ ահաբեկիչ-վարձկանների ու թուրքերի անմիջական աջակցությամբ։ Նոյեմբերի 10-ին վարչապետ Նիկոլ Փաշինյանը հայտարարեց, որ ՌԴ ու Ադրբեջանի նախագահների հետ պատերազմի դադարեցման համաձայնության է եկել։ Ըստ դրա՝ Ադրբեջանը և Հայաստանը կանգ առան իրենց զբաղեցրած դիրքերում: Իսկ ՌԴ խաղաղապահները տեղակայվեցին ԼՂ շփման գծի երկայնքում և Հայաստանի հետ կապող միջանցքում: Պատերազմի ընթացքում հայկական կողմը մեծ տարածքային կորուստներ ունեցավ՝ նահանջելով 4 տարածքից և Հադրութից։ Բացի այդ, ըստ եռակողմ հայտարարության, հայկական կողմը կորցրեց Շուշին, հետ քաշեց զորքերը Աղդամից, նույնը պետք է անի Քարվաճառի պարագայում՝ վերջնաժամկետը նոյեմբերի 25-ն է, իսկ մինչև դեկտեմբերի 1-ը` դուրս գա Լաչինից։