Մարզպետարան. Տավուշի մի քանի գյուղ Ադրբեջանին անցնելու լուրերն իրական չեն

PanARMENIAN.Net - Տավուշի մարզպետարանը հայտարարություն է տարածել՝ նշելով, որ մարզի մի քանի գյուղ Ադրբեջանին անցնելու լուրերն իրականությանը չեն համապատասխանում։

«Եվս մեկ անգամ հորդորում ենք չտարածել ապատեղեկատվություն, չվտանգել մեր սահմանների և սահմանապահ բնակիչների անվտանգությունը: Շրջանառվող այն տեղեկատվությունը, ըստ որի իբր Տավուշի մարզի մի քանի գյուղ և ճանապարհի մի հատված անցնում է Ադրբեջանի հսկողության տակ, իրականության հետ որևէ առնչություն չունի: Հարգելի տավուշցիներ, շրջանցեք թշնամու կողմից տարածվող ապատեղեկատվությունը»,- ասվում է հայտարարության մեջ։

Նշվում է նաև, որ Տավուշի յուրաքանչյուր բնակչի անվտանգության երաշխավորը հայկական բանակն է և հայ զինվորը:

Ավելի վաղ լուրեր էին շրջանառվում, որ հունվարի 11-ին Մոսկվայում Ադրբեջանի հետ նոր փաստաթուղթ է ստորագրվելու, որով Տավուշի մարզի մի քանի գյուղեր և ճանապարհահատվածի մի մասն անցնելու են Ադրբեջանի հսկողության տակ։

Սեպտեմբերի 27-ից Արցախի դեմ Ադրբեջանը պատերազմ էր սանձազերծել՝ ահաբեկիչ-վարձկանների ու թուրքերի անմիջական աջակցությամբ։ Նոյեմբերի 10-ին վարչապետ Նիկոլ Փաշինյանը հայտարարեց, որ ՌԴ ու Ադրբեջանի նախագահների հետ պատերազմի դադարեցման համաձայնության է եկել։ Ըստ դրա՝ Ադրբեջանը և Հայաստանը կանգ առան իրենց զբաղեցրած դիրքերում: Իսկ ՌԴ խաղաղապահները տեղակայվեցին ԼՂ շփման գծի երկայնքում և Հայաստանի հետ կապող միջանցքում: Պատերազմի ընթացքում հայկական կողմը տարածքային կորուստներ ունեցավ որոշ ուղղություններով, այդ թվում կորցրեց Շուշին։ Բացի այդ, ըստ եռակողմ հայտարարության, հայկական կողմը հետ քաշեց զորքերը Աղդամից, Քարվաճառից և Լաչինից։