ԱԺ-ում քննարկվում է Հակակոռուպցիոն և Հակակոռուպցիոն վերաքննիչ դատարանների ստեղծումը

PanARMENIAN.Net - Ազգային ժողովում քննարկվում է Դատական օրենսգրքում փոփոխություն կատարելու մասին օրենքի նախագիծը, որով առաջարկվում է ստեղծել Հակակոռուպցիոն և Հակակոռուպցիոն վերաքննիչ դատարաններ, հայտարարել է արդարադատության նախարար Ռուստամ Բադասյանը։

Նա հույս է հայտնել, որ դատարանների ստեղծումը կբարձրացնի կոռուպցիայի դեմ պայքարի արդյունավետությունը։

«Միաժամանակ ապօրինի ծագում ունեցող գույքի բռնագանձման գործընթացում ևս մասնագիտացվածությունն ապահովելու նպատակով նախագծերով առաջարկվում է ստեղծվել մասնագիտացված Հակակոռուպցիոն դատարան՝ առնվազն 25 դատավորով։ Նախատեսվում է, որ նրանցից 20-ը կքննեն կոռուպցիոն բնույթի գործերը, 5-ը կունենան ապօրինի ծագումով գույք բռնագանձելու քաղաքացիական հայցեր քննելու իրավունք»,- ասել է նա՝ նշելով, որ թվերը վերջնական չեն, երկրորդ ընթերցմամբ կարող է փոխվել՝ կապված մեկ այլ օրինագծից։

Նախագծով սահմանվել են նաև 2 դատարանում դատավոր նշանակվելու ավելի խիստ սահամանափակումներ։ Ըստ նախարարի՝ նախագծում դրույթներ են ավելացել նաև դատախազության հետ քննարկումների արդյունքում։

2019-ի ամռանը վարչապետ Նիկոլ Փաշինյանը հայտարարել էր երկրում հակակոռուպցիոն դատարանի ստեղծելու մտադրության մասին. նա նշել է, որ միջազգային գործընկերների հետ քննարկվել է այն երեք տարում ստեղծելու հեռանկարը: Դրանից մոտ մեկ տարի անց՝ 2020-ի օգոստոսին արդարադատության նախարարությունը հանրային քննարկման էր դրել օրինագծերի փաթեթ, որով առաջարկվում է ստեղծել հակակոռուպցիոն մասնագիտացված դատարան։

Ընթերցեք նաև․ Հակակոռուպցիոն և վերաքննիչ հակակոռուպցիոն դատարաններ կստեղծվեն․ Նախագիծն ԱԺ-ում է