Հայաստանի նախագահը Երեւանի քաղաքապետարանի աշխատակիցներին է ներկայացրել նոր քաղաքապետին

PanARMENIAN.Net - Հայաստանի նախագահ Սերժ Սարգսյանն այսօր Երեւանի քաղաքապետարանի եւ համայնքների ղեկավար կազմին ներկայացրել է նորանշանակ քաղաքապետ Գագիկ Բեգլարյանին: ՀՀ նախագահի մամլո ծառայության հաղորդման համաձայն, հանրապետության նախագահի խոսքով` Երվանդ Զախարյանը, վերջին 6 տարիների ընթացքում զբաղեցնելով Երեւանի քաղաքապետի պաշտոնը, ծառայելով երեւանցիներին, մեծ աշխատանք է կատարել եւ «այսօրվա Երեւանը, բնավ, չի կարելի համեմատել 2003թ. Երեւանի հետ»: Երկրի ղեկավարը շնորհակալություն է հայտնել նախկին քաղաքապետին եւ նշել, որ նա դեռեւս հնարավորություն կունենա իր ունակությունները դրսեւորելու այլ բնագավառներում:



Սերժ Սարգսյանի համոզմամբ, նորանշանակ քաղաքապետ Գագիկ Բեգլարյանը կարողանալու է թարմություն մտցնել քաղաքապետարանի աշխատանքում եւ այն փորձը, որ նա ձեռք է բերել` աշխատելով Կենտրոն համայնքում, ծառայեցնել ընդհանուր նպատակներին: Նախագահը նաեւ վստահություն է հայտնել, որ նա կարողանալու է, չնվազեցնելով քաղաքապետարանի դերն ու նշանակությունը, ներմուծել համայնքային դրական էլեմենտները:



Երկրի ղեկավարի խոսքով` «այսօր մենք պետք է ավելի լավ աշխատենք, քան երեկ, մեր օրենսդրությունը պետք է կարողանանք համապատասխանեցնել ժամանակակից չափանիշներին, մեր այսօրը պետք է տարբերվի երեկվանից»: Երեւանը մեկ համայնք դարձնելու վերաբերյալ մի քանի տարի առաջ ընդունած որոշումը գնահատելով ճիշտ` Սերժ Սարգսյանն ասել է. «մեր աշխատանքով պետք է այնպես անենք, որ չվարկաբեկենք այս գաղափարը, որը հաջողությամբ իրագործվում է ողջ քաղաքակիրթ աշխարհում եւ կարող է նույն հաջողությամբ ծառայել մեր համաքաղաքացիներին»:



Նախկին քաղաքապետ Երվանդ Զախարյանը շնորհակալություն է հայտնել համատեղ աշխատանքի եւ Երեւանի խնդիրների նկատմամբ Հանրապետության բարձրագույն ղեկավարության ամենօրյա ուշադրության համար:



Քաղաքապետ Գագիկ Բեգլարյանն իր հերթին ասել է, որ իր նկատմամբ դրսեւորած վստահությունը պարտավորեցնող է եւ հավաստիացրել է, որ կգործադրի բոլոր ջանքերը` թեթեւացնելու Երեւանի եւ երեւանցիների հոգսերը:





Նախօրեին Հայաստանի նախագահ Սերժ Սարգսյանը հրամանագիր է ստորագրել Եվրանդ Զախարյանին Երեւանի քաղաքապետի պաշտոնից ազատելու մասին: Նույն այդ հրամանագրով Եվրանդ Զախարյանը նշանակվել է Հայաստանի նախագահի խորհրդական:



Երկրի ղեկավարի նույն օրվա մեկ այլ հրամանագրով Երեւանի Կենտրոն համայնքի պետ Գագիկ Բեգլարյանը նշանակվել է Երեւանի քաղաքապետ:



Գագիկ Բեգլարյանը Կենտրոն համայնքի պետ էր ընտրվել 2002թ. եւ վերընտրվել 2005 եւ 2008թթ.: 2006թ.-ից նա հանդիսանում է Հայաստանի իշխող Հանրապետական կուսակցության անդամ:
 Ուշագրավ
Այցը ներառում էր կլոր սեղան-քննարկում, ելույթներ ԶԼՄ-ներում և հանդիպումներ պաշտոնյաների և բիզնեսի ղեկավարների հետ
Ծանուցումների պաշտոնական կայքում ծանուցագրի քաղվածքը տեղադրելու 10-րդ օրը քաղաքացին համարվում է պատշաճ ծանուցված
Նա նաև վստահություն է հայտնել, որ որևէ ՔՊ-ական չի գնա հանդիպման սրբազանի հետ
---