Փաշինյանը խնդրել է գեներալներին շարունակել ծառայությունը

PanARMENIAN.Net - Վարչապետ Նիկոլ Փաշինյանը ԳՇ այցի ժամանակ խնդրել է բարձրագույն սպայակազմիբ շարունակել իրենց ծառայությունը որպես Զինված ուժերի գեներալներ, սպաներ, Հայաստանի անվտանգության և տարածքային ամբողջականության երաշխավորը հանդիսացող մարմնի, կառույցի հենասյուներ:

«Ես հավատում եմ ձեզ, ես համոզված եմ, որ իսկապես այն ծառայությունները, որ դուք մատուցել եք՝ մատուցել եք անկեղծորեն, և էլի ուզում եմ կրկնել, որ այդ ծառայություններն արժանի են ամենաբարձր գնահատանքի ու այդ գնահատանքը երբեք, որևէ հանգամանքում, որևէ պարագայում չի կարող հօդս ցնդել», - նշել է նա բարձրագույն սպայակազմի հետ խորհրդակցության ժամանակ:

Դրան մասնակցել են Պաշտպանության նախարար Վաղարշակ Հարությունյանը, Գլխավոր շտաբի պետի տեղակալները, գեներալ-լեյտենանտ Արտակ Դավթյանը, ում Փաշինյանն առաջարկել է ԳՇ նոր պետի պաշտոնում։

Օնիկ Գասպարյանի պաշտոնանկությունից հետո ԳՇ-ն հայտարարություն էր տարածել, որ շարունակում է մնալ Փաշինյանի հրաժարականի անհրաժեշտության վերաբերյալ տեսակետին, սակայն նշել է, որ Գասպարյանի հորդորը պաշտոնից հեռանալուց առաջ ընդունվում է որպես հրաման։ Վերջինս ասել էր, որ Զինված ուժերի բացառիկ առաքելությունը հայրենիքի անվտանգության ապահովումն է, ուստի հորդորել էր շարունակել ծառայությունը բացառապես հայրենիքին և ժողովրդին՝ հանուն Զինված ուժերի զարգացման և Հայաստանի ու Արցախի հզորացման։

3-րդ բանակային կորպուսի հրամանատար Գրիգորի Խաչատուրովն ահատական հայտարարություն է տարածել՝ նշելով, որ շարունակում է պահանջել Փաշինյանի հրաժարականը։