Թուրքիա. Եթե Բայդենը ճանաչի Ցեղասպանությունը, դա կարող է վնասել հայ-թուրքական հարաբերություններին

PanARMENIAN.Net - Թուրքիան հայտարարել է, որ ԱՄՆ կողմից Հայոց ցեղասպանության ճանաչումը կարող է խանգարել Հայաստանի հետ հաշտեցման հնարավոր ջանքերին, գրում է Middle East Eye-ը։

The Wall Street Journal-ը և The New York Times-ը սեփական աղբյուրներին հղումով հայտնել են, որ ԱՄՆ նախագահ Ջո Բայդենը մտադիր է պաշտոնապես ճանաչել Հայոց ցեղասպանությունը։.

Թուրք պաշտոնյաները պնդում են, որ ԱՄՆ-ի այդ քայլն անարդյունավետ կլինի և էլ ավելի կթուլացնի երկկողմ հարաբերությունները, որոնք արդեն իսկ խարխլվել են մի քանի տարաձայնությունների պատճառով, այդ թվում՝ Անկարայի կողմից Ս-400 ռուսական համակարգերի գնման։

Բարձրաստիճան թուրք պաշտոնյաներից մեկը հայտարարել է, որ Լեռնային Ղարաբաղում ռազմական գործողությունների ավարտից հետո իրական հնարավորություն կա առաջիկա ամիսներին ՀՀ և Թուրքիայի միջև հաշտեցման համար։

«Մենք ցանկանում ենք կարգավորել հարաբերությունները Հայաստանի հետ։ Եթե մենք դրական դինամիկա տեսնենք, կկարողանանք բացել սահմանները։ Եթե այս պայմաններում ամերիկացիները 1915թ․ իրադարձությունները ցեղասպանություն անվանեն, դա կարող է սաբոտաժի ենթարկել ամբողջ գործաընթացը Կովկասում»,- ասել է պաշտոնյան։

Ըստ նրա՝ Թուրքիայի նախագահ Ռեջեփ Թայիփ Էրդողանի՝ արտաքին քաղաքականության գծով գլխավոր խորհրդականը մարտին նմանատիպ ուղերձ է հղել ԱՄՆ ազգային անվտանգության գծով խորհրդական Ջեյք Սալիվանին։

Թուրքիան ամեն անգամ նման «զգուշացումների» մասին է սկսում խոսել, երբ օտարեկրյա պետությունները կամ նախագահը պատրաստվում են ճանաչել Հայոց ցեղասպանությունը։ Թուրքիայի ԱԳՆ-ն սովորաբար հետ է կանչում դեսպանին՝ բողոք հայտնելով դրա դեմ։

Թուրքիայի արտգործնախարար Մևլութ Չավուշօղլուն օրերս հայտարարել է, որ Անկարայի ու Վաշինգտոնի հարաբերությունները կարող են լրջորեն տուժել, եթե Բայդենը ճանաչի Հայոց ցեղասպանությունը։

2019-ի դեկտեմբերին ԱՄՆ Սենատը բանաձև է ընդունել Օսմանյան կայսրությունում Հայոց ցեղասպանության ճանաչման մասին։ 2019-ի հոկտեմբերին բանաձև էր ընդունել ԱՄՆ Կոնգրեսի Ներկայացուցիչների պալատը։