Նուլանդը՝ ԼՂ դեմ սիրիացի ահաբեկիչների ներգրավման մասին․ Ավելի հարմար է առանձին քննարկել

PanARMENIAN.Net - Քաղաքական հարցերով ԱՄՆ պետքարտուղարի տեղակալ Վիկտորիա Նուլանդը, ԱՄՆ Սենատում պատասխանելով սենատոր Ռոբերտ Մենենդեսի հարցին ԼՂ-ում պատերազմի ժամանակ սիրիացի զինյալներին տեղափոխելուն Թուրքիայի ներգրավվածության վերաբերյալ հարցին, առաջարկել է այդ հարցն առանձին քննարկման առարկա դարձնել։

ԱՄՆ Սենատի արտաքին հարաբերությունների հանձնաժողովը հուլիսի 21- ին անցկացրել է լսումներ «Թուրքիայի նկատմամբ Միացյալ Նահանգների քաղաքականությունը» խորագրով, տեղեկացնում է «Ամերիկայի ձայնը»։

Լսումներին որպես պատասխանող կողմ հանդես էր գալիս ԱՄՆ պետքարտուղարի տեղակալ Նուլանդը, իսկ քննարկումը նախագահում էր Սենատի արտաքին հարաբերությունների հանձնաժողովի նախագահ, սենատոր Ռոբերտ Մենենդեսը: Վերջինս հարց է բարձրացրել Լեռնային Ղարաբաղի վերջին հակամարտության ընթացքում Թուրքիայի ներգրավվածության, մասնավորապես սիրիացի զինյալների՝ հակամարտության գոտի տեղափոխման շուրջ:

«Թույլ տվեք մեկ հարց ևս ուղղել: Արդյո՞ք տեղյակ եք, որ Թուրքիան նպաստել է Սիրիայից դեպի Ադրբեջան զինյալների տեղափոխմանը 2020 թվականին Լեռնային Ղարաբաղում պատերազմի ժամանակ»,- հարց է ուղղել սենատոր Մենենդեսը:

Նուլանդն առաջարկել է այդ հարցն առանձին քննարկել։

«Կարծում եմ, որ ավելի հարմար կլիներ Ձեր նշած այս դրույթը քննարկել առանձին առիթով մեկ այլ պայմաններում, եթե դա Ձեզ համար ընդունելի է, պարոն նախագահ»,- պատասխանել է նա:

Սենատոր Մենենդեսը դրական է արձագանքել՝ հավելելով, որ դրա հետ մեկտեղ սպասում է պետքարտուղարության արձագանքին պատերազմի օրերին Ադրբեջանի կողմից թուրքական անօդաչու թռչող սարքերի կիրառման մասին:

«Շատ լավ: Որպես դրա մի մաս, ես նաև անհամբեր սպասում եմ պետքարտուղարության արձագանքին, թե արդյոք ուսումնասիրել եք Ադրբեջանի կողմից պատերազմում օգտագործած թուրքական անօդաչու թռչող սարքերի գործածման հարցը: Այն ներառում էր ԱՄՆ-ում արտադրված մասեր, որը ես համարում եմ բոլորովին անընդունելի»,- արձագանքել է Մենենդեսը:

Ավելի վաղ ԱՄՆ Սենատի արտաքին հարաբերությունների հանձնաժողովի նախագահ Ռոբերտ Մենենդեսը, Եվրոպայի և Եվրասիայի հարցերով պետքարտուղարի տեղակալի պաշտոնում Քարեն Դոնֆրիդի թեկնածության հաստատման լսումների ժամանակ ադրադառնալով ՀՀ-ում սահմանային իրավիճակին, հայտարարել էր, որ Ադրբեջանը սահմանային հարցերի արդյունքում ներխուժել է Հայաստանի ֆիզիկական տարածք և կշարունակի իր ագրեսիվ պահվածքը, եթե հստակ ուղերձ չստանա, որ դա անընդունելի է։

Սենատորը նաև իր մտահոգությունն է հայտնել Բայդենի վարչակազմի կողմից «Ազատության աջակցության ակտի» 907-րդ ուղղումից հրաժարվելու վերաբերյալ, որով արգելվում էր ռազմական աջակցությունն Ադրբեջանին։