ԱՀ ՄԻՊ․ Արցախում սպանված 80 քաղանձի ինքնություն է պարզվել, որից 12-ը կանայք են

29 սեպտեմբերի 2021 - 11:43 AMT

PanARMENIAN.Net - Արցախի ՄԻՊ Գեղամ Ստեփանյանը հրապարակել է քաղաքացիական անձանց սպանության դեպքերի վերաբերյալ զեկույցի թարմացված տարբերակը՝ հակիրճ նկարագրություններով։

Մինչև 2021թ․ սեպտեմբերի 27-ը հավաքագրված տվյալներով պարզվել է Ադրբեջանի ԶՈւ կողմից սպանված 80 քաղաքացիական անձանց ինքնությունը։ 42-ը սպանվել են ադրբեջանական զինված ուժերի հեռահար հարվածների հետևանքով, իսկ 38-ը` գերության կամ առնվազն Ադրբեջանի վերահսկողության ներքո՝ ֆիզիկական բռնության, դանակահարության, գլխատման, հրազենային մերձակա կրակոցի և այլ անմիջական միջոցների կիրառմամբ: 80 զոհից 68-ը տղամարդիկ են, 12-ը` կանայք։

52 քաղաքացիական սպանվել է բնակության վայրում, 15-ը` հասարակական, 11-ը` աշխատանքի, 1 հոգի` ադրբեջանական բանտում։ Քաղաքացիական զոհերի թվում մեծամասնություն են կազմում 63 և ավելի տարիք ունեցող անձինք։

ԱՀ ՄԻՊ-ն արձանագրել է նաև 163 քաղաքացիական անձի վիրավորման դեպք, որոնց զգալի մասը տեղի է ունեցել այլ անձանց մահվան հանգեցրած հարվածների հետևանքով:

Ադրբեջանական օկուպացիայի տակ հայտնված տարածքներից երկու տասնյակ քաղաքացիական անձանց ճակատագիրը դեռևս մնում է անհայտ։

Ներկայացվել են միայն անառարկելի հիմքերով ապացուցված դեպքերը։ Յուրաքանչյուր քաղաքացիական զոհի սպանության հանգամանքների վերաբերյալ զեկույցում ներկայացված է հակիրճ նկարագրություն։ Զեկույցը պատրաստվել է փակ և հրապարակային տարբերակով։ Փակ զեկույցում ավելացված են բազմաթիվ լուսանկարներ՝ ներկայացնելով զոհերին մահից առաջ ու հետո:

Հրապարակային զեկույցը պատրաստվել է առանց լուսանկարների՝ հաշվի առնելով դրանցում առկա դաժան ու զգայուն պատկերները:

Զեկույցի փակ տարբերակն ուղարկվել է միջազգային համապատասխան կառույցներին:

Զեկույցում ամփոփվել են 2020թ. սեպտեմբերի 27-ից մինչև 2021թ․սեպտեմբերի 27-ը ընկած ժամանակահատվածում Արցախի ՄԻՊ աշխատակազմի փաստահավաք աշխատանքների արդյունքում հավաքագրված տվյալները Ադրբեջանի զինված ուժերի կողմից Արցախի քաղաքացիական բնակավայրերի թիրախավորման և ներխուժման հետևանքով զոհված քաղաքացիական անձանց վերաբերյալ։