Պատերազմում զոհված զինվորների ծնողներն անվճար կօգտվեն վերարտադրողական բուժօգնությունից

PanARMENIAN.Net - Պատերազմում զոհված զինծառայողների ծնողներն անվճար կօգտվեն վերարտադրողական բուժօգնությունից։ Գործադիրը հաստատել է ծնողների վերարտադրողական առողջության աջակցման միջոցառումը:

Ակնկալվում է հնարավոր միջոցներով ապահովել շահառուների` անվճար կամ արտոնյալ պայմաններով վերարտադրողականության օժանդակ տեխնոլոգիաների կիրառմամբ բժշկական օգնություն և սպասարկում ստանալու ընթացքում դոնորական ձվաբջջի և փոխնակ մոր ծառայության արժեքի փոխհատուցման հնարավորությունը։

Նշվում է, որ դա կխթանի վերջիններիս` վերարտադրողական օժանդակ տեխնոլոգիաների կիրառմամբ զավակ ունենալու հնարավորությունը։

Աշխատանքի և սոցիալական հարցերի նախարար Նարեկ Մկրտչյանն ասել է, որ վերջին ուսումնասիրությունները ցույց են տալիս, որ բազմաթիվ ծնողներ որոշում են կայացրել նոր զավակներ ունենալ, և քանի որ ծառայությունները թանկ են, հետևաբար չեն կարողանում իրականացնել իրենց որոշումը: «Այս նախագծի ընդունմամբ վերը նշված ծառայությունների համար ծախսերն ամբողջությամբ կիրականցվեն պետության կողմից»,-ասել է նախարարը:

Վարչապետ Նիկոլ Փաշինյանն ասել է, որ 2021-ին զոհված զինծառայողների 70-ից ավելի ընտանիքում երեխաներ են ծնվել:

«Կարծում եմ՝ սա շատ խորհրդանշական և արժեքային, գաղափարական նշանակություն ունեցող փաստ է: Եվ կրկին իմ խոնարհումը և հարգանքի տուրքը բոլոր այն ծնողներին, ովքեր նման որոշում են կայացրել», - ասել է նա:

ՀՀ առողջապահության նախարար Անահիտ Ավանեսյանը նշել է, որ փուլ առ փուլ մեծացվում է այս ուղղությամբ ծառայությունների հասանելիությունը: Ըստ նախարարի, 2021 թվականին զինվոր կորցրած մայրերից 27-ի մոտ հղիություն է գրանցվել: