«Վստրեչի Ապերի» ապօրինի գույքի բռնագանձման հայցադիմումը դատարան է վարույթ ընդունվել

PanARMENIAN.Net - 2022 թվականի հունվարի 20-ին Երևան քաղաքի առաջին ատյանի ընդհանուր իրավասության դատարան է ներկայացվել ապօրինի ծագում ունեցող գույքի բռնագանձման վերաբերյալ չորրորդ հայցադիմումը, որն ընդունվել է վարույթ, տեղեկացնում է ՀՀ գլխավոր դատախազությունը:

Համաձայն վերջինի՝ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին Արամ Վարդանյանից (առավելապես հայտնի որպես «Վստրեչի Ապեր»), նրա հետ փոխկապակցված 2 անձանցից հօգուտ ՀՀ-ի բռնագանձել մասնավորապես՝

Երևան քաղաքում գտնվող 10 բնակարանը, բնակելի տները, խանութը, շինությունները, Կոտայքի և Տավուշի մարզերում գտնվող 4 հողամասերը, 2 տրանսպորտային միջոցները, իսկ անհնարինության դեպքում՝ դրանց միջին շուկայական արժեքը, որն ընդհանուր կազմում է 870,997,100 դրամ,

260,298,106 դրամ՝ որպես ապօրինի դրամական միջոցների մնացորդ,

472,097,316 դրամ, որը չի հիմնավորվում անձի օրինական եկամուտներով, ունի ապօրինի ծագում և հնարավոր չէ բռնագանձել՝ հիմք ընդունելով ապօրինի ծագում ունեցող գույքի բռնագանձման մասին օրենքի 20-րդ հոդվածի 4-րդ մասը:

Առաջիկայում վարչության կողմից այլ գործերով, որոնցով արդեն իսկ կիրառվել են հայցի նախնական ապահովման միջոցներ, ևս կներկայացվեն ապօրինի գույքի բռնագանձման հայցադիմումներ։