Լեհաստանի դեսպան․ ԵԱՀԿ նախագահի՝ Երևանում և Բաքվում հանդիպումների մասին հայտարարություն կլինի Վիեննայից

PanARMENIAN.Net - ՀՀ-ում Լեհաստանի դեսպան Պավել Չեպլակը, անդրադառնալով Լեհաստանի ԱԳ նախարար, ԵԱՀԿ գործող նախագահ Զբիգնև Ռաուի տարածաշրջանային այցի արդյունքներին, նշել է, որ չի կարող բարձրաձայնել քննարկումների բոլոր մանրամասները, որոնք եղել են Հայաստանում և Ադրբեջանում հանդիպումներում։

«Հանդիպումները, որոնք տեղի ունեցան Բաքվում և Երևանում, փակ են եղել և ոչ բոլոր հարցերին է հնարավոր անդրադառնալ։

Պայմանավորվածության համաձայն՝ առաջինը հայտարարությամբ հանդես կգա Վիեննայի գրասենյակի մամուլի խոսնակը»,- ասել է նա, գրում է Factor.am-ը։

Ըստ Չեպլակի՝ Զբիգնև Ռաուի հետ հանդիպմանը ՀՀ վարչապետ Փաշինյանը գլխավորապես նպատակ է ունեցել առաջարկներ լսել և ստացել է հստակ պատասխաններ։ «Կուզենայի հստակ նշել, որ շատ անկեղծ և բաց զրույց է եղել Նիկոլ Փաշինյանի և Լեհաստանի ԱԳ նախարարի միջև, բավական դրական եմ գնահատում զրույցը»,- ասել է նա։

Ապրիլի 6-ին Բրյուսելում կայանալու է ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը՝ Եվրոպայի խորհրդի նախագահ Շառլ Միշելի միջնորդությամբ։