Առաջարկ. 44-օրյայի քննիչ հանձնաժողովի գործունեությունը ևս 6 ամսով երկարաձգել

4 հոկտեմբերի 2022 - 14:41 AMT

PanARMENIAN.Net - ԱԺ-ում առաջարկվել է ևս 6 ամսով երկարաձգել 44-օրյա պատերազմի հանգամանքների ուսումնասիրող քննիչ հանձնաժողովի գործունեության ժամկետը։ Այդ մասին հայտնել է Քննիչ հանձնաժողովի նախագահ Անդրանիկ Քոչարյանը:

Նա նշել է, որ Պաշտպանության նախարարության կողմից ստացվել են մեծաքանակ փաստաթղթեր, որոնք ուսումնասիրման փուլում են:

Նա ներկայացրել է նախորդ վեց ամսում հանձնաժողովի և փորձագետների իրականացրած աշխատանքը: Մարտ ամսին հանձնաժողովի կողմից մշակվել և քննարկումներից հետո մարտի 30-ին Պաշտպանության նախարարության կողմից ներկայացվել է 16 կետից բաղկացած առանցքային փաստաթղթերի ցանկը: Ըստ դրա՝ նախարարությունը մոտ 2 ամիս ձևավորել է պահանջվող փաստաթղթերի փաթեթի մի մասը և ներկայացրել հանձնաժողովի ուսումնասիրմանը: Այն ներառում է մոտ 3500 նմուշի տեքստային և գրաֆիկական փաստաթղթեր, ընդհանուր 10,000 էջից ավելի ծավալով, որը դեռ վերջնական չէ:

Փաստաթղթի ուսումնասիրման ընթացքում բացահայտված նոր փաստերով և տեղեկություններով պայմանավորված՝ նախարարությունից և պետական այլ մարմիններից նոր փաստաթղթեր ու տվյալներ ստանալու անհրաժեշտություն է առաջացել:

Քոչարյանը նշել է, որ փաստաթղթերի ուսումնասիրության հիման վրա հնարավոր կլինի կազմել հանձնաժողովի կողմից քննման ենթակա անձանց ցանկը և նրանց հրավիրելու ժամկետները:

2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման ԱԺ քննիչ հանձնաժողովը ստեղծվել է 2022-ի փետրվարին։ Հանձնաժողովը ստեղծվել է «Քաղաքացիական պայմանագիր» խմբակցության պատգամավորների նախաձեռնությամբ։ ‌