Եղոյան․ ՀՀ և Ադրբեջանի ԱԳ նախարարների հանդիպում նաև Մոսկվայում է նախատեսված

PanARMENIAN.Net - ԱԺ «Քաղաքացիական պայմանագիր» խմբակցության պատգամավոր Արման Եղոյանը լրագրողների հետ ճեպազրույցում հայտնել է, որ Հայաստանի և Ադրբեջանի արտգործնախարարներ Արարատ Միրզոյանը և Ջեյհուն Բայրամովը, համաձայն նախնական պայմանավորվածության, կհանդիպեն նաև Մոսկվայում:

«Ըստ պայմանավորվածության՝ հանդիպում պետք է լինի նաև Մոսկվայում»,-ասել է նա, հայտնում է Shantnews.am-ը։

Խոսելով ԱԳ նախարարների վաշինգտոնյան հանդիպման մասին՝ Եղոյանը նշել է, որ Հայաստանն ընթացող բանակցություններից առավելագույն ակնկալիքներ ունի։

«Բանակցություններն անդրադառնում են հայ-ադրբեջանական հարաբերությունների ամբողջ սպեկտրին, չլուծված բոլոր հարցերին: Եվ, բնականաբար, այդ բոլոր հարցերով արվելու է ամեն ինչ՝ համաձայնության հասնելու համար »,-ասել է Եղոյանը:

Մայիսի 1-ին ԱՄՆ պետքարտուղար Էնթոնի Բլինքենն առանձին հանդիպումներ է ունեցել ՀՀ և Ադրբեջանի ԱԳ նախարարներ Արարատ Միրզոյանի և Ջեյհուն Բայրամովի հետ, որին հաջորդել է եռակողմ հանդիպումը։

Միրզոյան-Բլինքեն-Բայրամով հանդիպմանը քննարկվել են անվտանգային իրավիճակի, ՀՀ և Ադրբեջանի միջև կարգավորման կարգավորման գործընթացի հարցեր: Անդրադարձ է կատարվել Ադրբեջանի կողմից Լաչինի միջանցքի ապօրինի արգելափակման հետևանքով ստեղծված հումանիտար իրավիճակին: