Մեծի Տանն Կիլիկիո կաթողիկոս Արամ Ա-ն հունսիսի 30-ին հեռախոսազրույց է ունեցել Արցախի նախագահ Արայիկ Հարությունյանի հետ՝ ևս մեկ անգամ վերահաստատելով Մեծի Տանն Կիլիկիո կաթողիկոսության զորակցությունը Արցախի ժողովրդին: Այդ մասին ասվում է կաթողիկոսի ֆեյսբուքյան էջում։

Զրուցակիցները կարևորել են Արցախի ինքնորոշման իրավունքն ամուր պահելու հրամայականը։

«Վեհափառ հայրապետը Արցախի նախագահին տեղյակ է պահել Հունաստանի ու Կանադայի վարչապետների և Կիպրոսի նախագահի հետ ունեցած խորհրդակցությունների մասին, որոնք վերաբերել են Արցախի հարցին։ Նա հիշատակել է վերոնշյալ պաշտոնյաների մոտեցումները այս հարց վերաբերյալ»,– ասված է հաղորդագրությունում։

Հարությունյանն էլ իր հերթին անդրադարձել է Արցախի դիմագրաված ներկայիս մարտահրավերներին։

2022-ի դեկտեմբերի 12-ին Լաչինի միջանցքի Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին: ՄԱԿ-ի Արդարադատության (Հաագայի) միջազգային դատարանը պահանջել է բացել , սակայն Ադրբեջանը մինչ օրս չի կատարել այդ պահանջը։ 2023-ի ապրիլի 23-ին Ադրբեջանը, հերթական անգամ կոպտորեն խախտելով 2020թ. եռակողմ հայտարարության դրույթները, փակել է Արցախ-Հայաստան սահմանագծին գտնվող Հակարիի կամուրջը, որը գտնվում է ՌԴ խաղաղապահ զորակազմի պատասխանատվության տիրույթում՝ Լաչինի միջանցքում։ Ադրբեջանի պետական սահմանապահ ծառայությունը հայտարարել է, որ հսկիչ անցագրային կետ է տեղակայել Լաչին-Ստեփանակերտ ճանապարհին։ 10 օր շարունակ՝ հունիսի 15-հունիսի 25-ը, անցակետը փակ էր նույնիսկ ԿԽՄԿ և խաղաղապահների մեքենաների համար։

Հունիսի 28-ին՝ ժամը 01:30-ից, Ադրբեջանի ԶՈւ ստորաբաժանումները հրետանային միջոցներից կրակ են բացել Մարտունու և Մարտակերտի հայկական դիրքերի ուղղությամբ` կիրառելով նաև ԱԹՍ-ներ։ Հայկական կողմն ունի 4 զոհ, հայտնում է Արցախի պաշտպանության նախարարությունը։