Փարաքարի ղեկավարը հրաժարական է տվել

PanARMENIAN.Net - Փարաքար համայնքի ղեկավար Դավիթ Մինասյանը հրաժարական է ներկայացրել։ Նա այդ մասին հայտնել է ֆեյսբուքյան իր էջում։

«Փարաքար խոշորացված համայնքի հարգելի բնակիչներ, հայտարարում եմ, որ ավագանու «Դավիթ Մինասյան» խմբակցության արդեն նախկին անդամ Էմին Երիցյանը խախտել է քաղաքական պայմանավորվածությունը՝ միանալով Փարաքար համայնքի ղեկավարին անվստահություն հայտնելու գործընթացին: Իբրև հուսալի գործընկեր՝ ստեղծված իրավիճակի մասով կրում եմ քաղաքական պատասխանատվություն և հրաժարական եմ ներկայացնում Փարաքար համայնքի ղեկավարի պաշտոնից՝ պաշտպանելով համայնքի ղեկավարի պաշտոնում «Քաղաքացիական պայմանագիր» խմբակցության անդամ Լյուդվիգ Գյուլնազարյանի թեկնածությունը:

Շնորհակալություն եմ հայտնում վստահության և համագործակցության համար»,–ասվում է գրառման մեջ։

2022–ի ընտրություններից հետո ՔՊ-ն և «Դավիթ Մինասյան» դաշինքը պայմանավորվել էին, որ ընտրվելուց հետո առաջին 2.5 տարին պաշտոնավարելու է Մինասյանը, հաջորդ 2.5 տարին՝ ՔՊ թեկնածուն։

«Ապրելու երկիր» կուսակցության համահիմնադիր Մեսրոպ Առաքելյանն իր հերթին հայտնել է, որ իր խմբակցությունը համայնքի ղեկավարի իմպիչմենտի գործընթաց էր նախաձեռնել։ Այդ մասին նա հայտնել է ֆեյսբուքյան իր էջում։

«Փարաքար համայնքի «Ապրելու երկիր» խմբակցությունը երեկ նախաձեռնել էր համայնքի ղեկավարի իմպիչմենտի գործընթաց։ Փաստաթղթերը ներկայացնելուց մի քանի ժամ անց, համայնքի ղեկավարը հրաժարական տվեց»,–ասվում է գրառման մեջ։

Դավիթ Մինասյանը Փարաքարի ղեկավարի պաշտոնում ընտրվել է «Դավիթ Մինասյան» դաշինքի ցուցակով՝ 2022թ․ հունվարի 9-ին։ Փարաքարում «Ապրելու Երկիր» կուսակցությունը ստացել էր 10 ավագանու մանդատ, «Քաղաքացիական պայմանագիր» կուսակցությունը ստացել էր 6 մանդատ, իսկ «Դավիթ Մինասյան» դաշինքը՝ 5, սակայն համայնքի ղեկավար ընտրեցին ամենաքիչ ձայներ ստացած ուժի թեկնածուին։ «Ապրելու Երկիր» խմբակցության ավագանու անդամներն ու նրանց աջակիցները դրա դեմ բողոքի ակցիաներ էին անում։