Օ՛Բրայեն. Շարունակելու ենք աշխատել ՀՀ հետ պաշտպանության և անվտանգության հարցերում

PanARMENIAN.Net - ԱՄՆ Եվրոպայի և Եվրասիայի հարցերով փոխպետքարտուղար Ջեյմս Օ՛Բրայենը Երևանում ընթացող Հայաստան-ԱՄՆ ռազմավարական երկխոսության նիստում հայտարարել է, որ ԱՄՆ–ն շարունակելու է աշխատել ՀՀ հետ պաշտպանության և անվտանգության հարցերում։

«Անցած տարի տեղի ունեցավ առաջին համատեղ զորավարժությունը՝ «Արծիվ գործընկեր», սպասում ենք ավելիի։ Նաև կիբերանվտանգության ոլորտում, սահմանների անվտանգության, պարենային ու էներգետիկ անվտանգության ասպարեզում ենք ակնկալում աշխատել»,-ասել է նա, գրում է Aysor.am-ը։

Ջեյմս Օ՛Բրայենը նշել է նաև, որ այդ ուղղություններից զատ ԱՄՆ-ն նաև աջակցում է տևական խաղաղության հաստատման ջանքերին տարածաշրջանում, նաև տնտեսական հնարավորությունների ընդլայնման ուղղությամբ՝ Կենտրոնական Ասիայից մինչև Միջերկրական ծով։

«Եթե տևական խաղաղություն լինի ՀՀ-ի և Ադրբեջանի միջև, այդ հնարավություններն ավելին կլինեն և ուրախ ենք այդ ասպարեզում աջակցել եղած ջանքերին»,-ասել է նա։

Ըստ նրա՝ ՀՀ-ի ժողովուրդը վերջին տարիներին քանիցս վերահաստատել է բարեփոխումների իրենց ցանկությունը և ԱՄՆ-ն հպարտ է աջակցել ժողովրդավարության ջանքերին։

«Գիտենք, որ ՀՀ-ի համար անվտանգությունը, բարեկեցությունը և ժողովրդավարությունը միասին զուգահեռ կողք-կողքի գոյություն ունեն և նշված երեք աշխատանքային խմբերն աշխատում են մեր ռազմավարական երկխոսության շրջանակում»,-ասել է նա։

«Արծիվ գործընկեր» հայ-ամերիկյան զորավարժությունն անցկացվել է ՀՀ–ում 2023–ի սեպտեմբերին, որին մասնակցել են ԱՄՆ ցամաքային ուժերի Եվրոպայի և Աֆրիկայի շտաբի պետի օպերատիվ գծով տեղակալ բրիգադային գեներալ Պատրիկ Էլիսը և 10-րդ լեռնային դիվիզիայի հրամանատար գեներալ-մայոր Գրեգորի Անդերսոնը։