Փաշինյան․ ՀՀ-ում էլէներգիայի խնդիրը գնալով խորանում է, անջատումները համատարած են

PanARMENIAN.Net - Հայաստանում էլեկտրաէներգիայի խնդիրը գնալով խորանում է, և անջատումները կրում են համատարած բնույթ։ Այդ մասին կառավարության նիստում ասել է վարչապետ Նիկոլ Փաշինյանը։

«Շիրակի, Սյունիքի, Տավուշի, Վայոց Ձորի մարզերի գյուղերում այդ բողոքներն անընդհատ կան։ Խնդիրն այնքան հրատապ է, որ այդ հարցերը մարդիկ բարձրացնում են մեր մարզային այցերի ընթացքում»,– ասել է Փաշինյանը, հայտնում է Sputnik Արմենիան։

Նա ընդգծել է, որ խնդիրը հնարավորինս արագ պետք է քննարկել, հասկանալ պատճառները։

«Իմ ընկալմամբ՝ խնդիրն ավելի է խորանում... Հանրային ծառայությունները կարգավորող հանձնաժողովից և նախարարությունից ակնկալում եմ հստակ ծրագիր, թե ինչպես մենք կարող ենք հնարավորինս արագ լուծել այս հարցը»,- ասել է վարչապետը։

ՀԾԿՀ ղեկավար Գարեգին Բաղրամյանը նշել է, որ մի շարք ծրագրեր արդեն իսկ իրականացվել են՝ հաշվի առնելով վերջին 3 տարում ավելացող նոր բաժանորդների ահռելի թիվը։

Նրա խոսքով` եթե 10-ամյա ներդրումային ծրագրով նախատեսվում էր տարեկան 4 մլրդ դրամի ներդրում անել, ապա այս տարի, հաշվի առնելով ծանրաբեռնվածության աճը, ներդրումները կկազմեն 26 մլրդ դրամ։

Այդ կապակցությամբ ՀԾԿՀ-ն վերացրել է ընկերության համար ներդրումների տարեկան ծավալի սահմանափակումը (սակագների բարձրացումը կանխելու համար) և ավելացրել նոր բաժանորդների միացման վճարը։

Փաշինյանն իր հերթին նշել է, որ ենթակառուցվածքները չեն համընկնում Հայաստանի զարգացման հետ։ Դա վերաբերում է ոչ միայն էլեկտրաէներգիային, այլև ջրամատակարարմանը, ճանապարհաշինությանը, թափոնների կառավարմանը:

«Բայց կոնկրետ էլեկտրաէներգիայի խնդիրը համատարած է... Մենք դա կքննարկենք հաջորդ շաբաթ, և մեզ պետք է հստակ լուծման ծրագիր»,- ընդգծել է վարչապետը։

ՀԷՑ-ի տնօրենների խորհրդի նախագահ Կարեն Դարբինյանը, անդրադառնալով վերջին շրջանում հաճախակի դարձած հոսանքազրկումներին, ասել է, որ դրանք հաճախ ՀԷՑ-ի պատասխանատվության դաշտից դուրս են։ Նա նշել է, որ կառավարության նիստի ժամանակ լույսերն անջատվել են ԲԷՑ-ում կատարվող աշխատանքների պատճառով, այն ՀԷՑ-ի պատասխանատվության դաշտից դուրս էր: