Նախարար․ Սնուփ Դոգի համերգը, հնարավոր է, նոյեմբերին կայանա

PanARMENIAN.Net - ԿԳՄՍ նախարար Ժաննա Անդրեասյանը, անդրադառնալով Երևանում այդպես էլ չկայացած հայտնի ռեփեր Սնուփ Դոգի համերգին, ասել է, որ, հնարավոր է, այն տեղի ունենա նոյեմբերին, հայտնում է Factor.am-ը։

Նա հավելել է, որ համերգի կազմակերպչի հետ վերջին ճշտումներով բանակցությունների գործընթացն ամփոփվում է՝ նոյեմբերի ընթացքում ինչ-որ օր առաջարկելու համար։

Ճշգրտող հարցին, թե արդյոք նոյեմբերին համերգը տեղի կունենա, նախարարը պատասխանել է, որ հնարավոր է։

«Հնարավոր է, այո, սպասում ենք կազմակերպության կողմից վերջնական պատասխանի»,–ասել է նա:

Համերգի մասին բանակցողն ու կազմակերպողը «Դոփինգ Սփեյս» ընկերությունն է։

Ավելի վաղ հայտնի դարձավ, որ Մրցակցության պաշտպանության հանձնաժողովը ռեփեր Սնուփ Դոգի՝ դեռևս անցած տարվա սեպտեմբերին նախատեսված և չկայացած համերգի ֆինանսավորման վերաբերյալ վարույթ է հարուցել առերևույթ արգելված պետական օժանդակության հատկանիշներով։ ՄՊՀ–ն արձանագրել է, որ Սնուփ Դոգի հայաստանյան համերգը կազմակերպելու նպատակով «Դոպինգ Սփեյս» ընկերությանը օժանդակություն տրամադրման հարցում դրսևորվել է ընտրողականություն, քանի որ ծրագրի իրականացումը վստահված է մեկ տնտեսավարողի՝ առանց մրցույթի:

ՀՀ կառավարության 2023 թ. օգոստոսի 11–ի որոշմամբ` «Համաշխարհային աստղի հայաստանյան հյուրախաղեր» երաժշտական նախագծի շրջանակում Սնուպ Դոգի հայաստանյան համերգը կազմակերպելու նպատակով «Դոպինգ Սփեյս» ընկերությանը տրամադրվել է 2 մլրդ 318 մլն 596 800 դրամ։ ԿԳՄՍՆ-ի և ընկերության միջև կնքված պայմանագրով գումարը տրամադրվել է դրամաշնորհի տեսքով։ Այդ գումարն օգոստոսի 25-ին ամբողջությամբ վճարվել է։ Սնուփ Դոգը գումարը չի վերադարձրել։ Ռեփերի հոնորարը կազմում է 1.8 մլն դոլար։