Միրզոյան․ Բաքվի հետ համաձայնագրի նախագծի նախաբանի և 17 հոդվածից 15-ը համաձայնեցված է

PanARMENIAN.Net - ԱԳ նախարար Արարատ Միրզոյանը ԵԱՀԿ նախարարների խորհրդի 31-րդ նիստում իր ելույթում հայտարարել է, որ ՀՀ–ն ու Ադրբեջանը համաձայնության են եկել համաձայնագրի նախագծի նախաբանի և 17 հոդվածից 15-ի շուրջ։

Նա հավելել է, որ եթե լինի բավարար քաղաքական կամք, այն կարող է արագորեն վերջնականացվել և ստորագրվել։

«Այս տարի երկկողմ բանակցությունները հանգեցրին Հայաստանի և Ադրբեջանի միջև սահմանի սահմանազատման կանոնակարգի ստորագրմանը, որով սահմանազատման հիմք ընդունվեց 1991 թվականի Ալմաթիի հռչակագիրը։ Տեղում մեզ հաջողվեց սահմանազատել ավելի քան 12 կմ սահման, և հուսով ենք, որ այս փաստաթուղթը ճանապարհ կհարթի գործընթացի արդյունավետ շարունակման համար և այդպիսով էապես կնպաստի տարածաշրջանում կայունության հաստատմանը։

Մենք նաև որոշակի առաջընթաց ենք գրանցել մեր երկու երկրների միջև Խաղաղության համաձայնագրի ստորագրման ուղղությամբ։ Մենք համաձայնության ենք եկել համաձայնագրի նախագծի նախաբանի և 17 հոդվածներից 15-ի շուրջ, և եթե լինի բավարար քաղաքական կամք, այն կարող է արագորեն վերջնականացվել և ստորագրվել։ Հայաստանը շարունակաբար ապացուցել է իր պատրաստակամությունը ստորագրելու համաձայնագիրը և փակելու թշնամության էջը Հարավային Կովկասում»,–ասել է նա։

Միրզոյանը նշել է, որ խաղաղությունն այլընտրանք չունի, քանի որ տարածաշրջանի ժողովուրդն արդեն շատ է տուժել արյունալի հակամարտություններից։

«Ի հեճուկս բոլոր դժվարություններին, մենք հաստատակամ ենք շարունակելու մեր ջանքերը՝ հասնելու ցանկալի նպատակին։ Այս համատեքստում հայկական կողմի առաջարկած «Խաղաղության խաչմերուկ» կապուղիների նախագիծը մեծ ներուժ ունի բարձրացնելու վստահությունը, ամրապնդելու վստահության մթնոլորտը և խթանելու տարածաշրջանի երկրների միջև ավելի լավ փոխգործակցություն։

Մենք հավատում ենք, որ Հայաստանի և Թուրքիայի միջև հարաբերությունների լիակատար կարգավորումը, հատկապես դիվանագիտական հարաբերությունների հաստատումը և սահմանների բացումը, կարող է լինել խաղաղության և կայունության կարևոր մյուս ներդրումը տարածաշրջանում։ Այս նպատակով մենք շարունակում ենք երկխոսությունը մեր թուրք գործընկերների հետ և իրականացնում որոշ գործնական քայլեր, այդ թվում՝ Հայաստանի և Թուրքիայի միջև կամուրջի, ինչպես նաև Գյումրի-Կարս երկաթգծով սահմանային անցման տեխնիկական պահանջների համատեղ գնահատում: Երբ համաձայնությունները կյանքի կկոչվեն, դրանք դրական ազդեցություն կունենան տարածաշրջանի և դրա սահմաններից դուրս ժողովուրդների վրա»,–ասել է ԱԳ նախարարը։

Մինչդեռ Ադրբեջանի արտգործնախարար Ջեյհուն Բայրամովը, ելույթ ունենալով ԵԱՀԿ նախարարական խորհրդի 31-րդ հանդիպմանը, կրկին խոսել է ՀՀ Սահմանադրությունում իբր առկա «տարածքային պահանջների» և ԵԱՀԿ Մինսկի խումբը լուծարելու անհրաժեշտության մասին։

Դեկտեմբերի 5–ինԱդրբեջանի նախագահ Իլհամ Ալիևը հայտարարել է, թե Հայաստանը պետք է բանակցություններ սկսի այսպես կոչված «արևմտյան ադրբեջանցիների» համայնքը հետ և գործնական քայլեր ձեռնարկի նրանց «հիմնարար իրավունքների վերականգնման ուղղությամբ»։ Նա այդ մասին ասել է Բաքվում բացված խորհրդաժողովում, որն անցում է «Վերադարձի իրավունք. Հայաստանից բռնի տեղահանված ադրբեջանցիների համար արդարության վերականգնում» խորագրով։

Նույն օրը՝ դեկտեմբերի 5–ին ՀՀ վարչապետ Նիկոլ Փաշինյանը հայտարարել է, որ խաղաղության պայմանագրի տեքստի մոտ 90 տոկոսն արդեն համաձայնեցված է։ Ավելի վաղ Փաշինյանը հայտարարել է, որ hայկական կողմն առաջարկել է ստորագրել խաղաղության պայմանագրի արդեն համաձայնեցված հոդվածները` մինչև Բաքվում կայանալիք COP29-ը, բայց դա տեղի չունեցավ։ Ադրբեջանը մերժեց այդ առաջարկը։ Ալիևը հայտարարել է, որ առանց ՀՀ սահմանադրության փոփոխության խաղաղության պայմանագրի կնքումն անհնար կլինի։