Հակոբ Ասլանյանը հեռացվել է ՔՊ խմբակցությունից՝ քաղաքական ուղեգծի հետ խիստ անհամատեղելի վարքի պատճառով

PanARMENIAN.Net - ԱԺ պատգամավոր Հակոբ Ասլանյանը հեռացվել է «Քաղաքացիական պայմանագիր» խմբակցությունից։ Այդ մասին ֆեյսբուքյան իր էջում հայտնել է խմբակցության ղեկավար Հայկ Կոնջորյանը:

«Քաղաքացիական պայմանագիր խմբակցությունը միաձայն որոշում է կայացրել հեռացնել Հակոբ Ասլանյանին խմբակցության կազմից` լրջագույն կարգապահական խախտման, ինչպես նաև Քաղաքացիական պայմանագիր կուսակցության որդեգրած արժեքների և քաղաքական ուղեգծի հետ խիստ անհամատեղելի վարքի պատճառով»,–ասվում է գրառման մեջ։

Խմբակցության քարտուղար Արթուր Հովհաննիսյանը հայտնել է, որ նրան կուսակցությունից հեռացնելու որոշումը կորոշվի վարչության նիստում, հայտնում է «Ազատությունը»։

Ըստ խմբակցության քարտուղարի՝ Հակոբ Ասլանյանը չի ցանկանում մանդատը վայր դնել։ Ինքը՝ Ասլանյանը, հրաժարվել է մեկնաբանել խմբակցության որոշումը:

Ավելի վաղ Հակոբ Ասլանյանը հայտարարել էր, որ նախընտրում է արդարությունը և հանուն ընկերոջ՝ պատգամավոր Հովիկ Աղազարյանի, մեկ ամսով կասեցնում է անդամակցությունը Փաշինյանի գլխավորած կուսակցությանը: Սակայն, մի քանի ժամ անց Ասլանյանի ֆեյսբուքյան էջում հայտնվեց «Քաղաքացիական պայմանագրի» վարչության անդամ, բարձր տեխնոլոգիական արդյունաբերության նախարար Մխիթար Հայրապետյանի հետ նամակագրությունը (screenshot)։ ՔՊ-ական նախարարը Ասլանյանին տեքստ է ուղարկել, որ նա իր անունից հրապարակի, որ զղջում է հայտարարությունների համար։

Մխիթար Հայրապետյանը հաստատել է, որ իր նամակն իրական է` ասելով, որ Ասլանյանն իր ուսուցիչն է եղել և իր հետ խորհրդակցել է ու խնդրել օգնել հայտարարության տեքստ գրել։

ԲՏԱ նախարարությունը ևս պարզաբանում է տարածել նամակագրության վերաբերյալ՝ նույն բովանդակությամբ։

«Պատգամավոր Հակոբ Ասլանյանը ՀՀ ԲՏԱ նախարար Մխիթար Հայրապետյանի դպրոցական ուսուցիչն է եղել, 2016 թվականին ՔՊ-ին անդամագրվել է նախարարի միջոցով։ Ասլանյանն այսօր խորհրդակցել է նախարարի հետ և խնդրել իրեն օգնել իր հայտարարության տեքստի հետ կապված»,–ասվում է պարզաբանման մեջ։

Ազգային ժողովի պատգամավոր Հովիկ Աղազարյանի կողմից պետական գաղտնիք պարունակող տեղեկատվության արտահոսքի կազմակերպման վերաբերյալ հրապարակումն ուղարկվել է Հակակոռուպցիոն կոմիտե վարույթ նախաձեռնելու հարցը լուծելու համար:

«Քաղաքացիական պայմանագիր» կուսակցությունը պատգամավոր Հովիկ Աղազարյանին հեռացրել է կուսակցությունից: Աղազարյանն իր հերթին դեկտեմբերի 4-ին հայտնել է, որ դուրս է գալիս ՔՊ խմբակցությունից: Խմբակցության ղեկավար Հայկ Կոնջորյանը նշել էր, որ Աղազարյանը խմբակցության նիստերից, այլ ներքին քննարկումներից, այդ թվում՝ պետական անվտանգությանը վերաբերող թեմաներով, որոնք ենթակա չէին հրապարակման, արտահոսքեր է կազմակերպել։ Դա դարձել է նրան կուսակցությունից հեռացնելու հիմքերից մեկը: Նրան հեռացնելու հիմք են ծառայել նաև «հանրության բարոյական նորմերի կոպիտ խախտումները»։