ԱՆ ՀՎԿԱԿ․ Կարմրուկի նոր դեպքերի թիվը կայուն նվազում է

PanARMENIAN.Net - Համաճարակային իրավիճակը կայուն է, որևէ արտառոց բան այս տարվա ընթացքում չի գրանցվել։ Այդ մասին լրագրողների հետ հանդիպմանը նշել է Առողջպահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Զարուհի Գրիգորյանը։

Նա նշել է, որ կարմրուկի դեպքերի կայուն նվազում է գրանցվում, հայտնում է «Ա1+»–ը։

«Նոր դեպքերի թիվը կայուն նվազում է, նոյեմբերի վերջին շաբաթների ընթացքում կարմրուկի ոչ մի դեպք չի գրանցվել»,- ասել է նա։

Մասնագետը նշել է, որ կարմրուկի բռնկում գրանցվեց այս տարվա գարնանը, սակայն վերջին 4-5 ամսվա կարմրուկի հատուկենտ դեպքեր են գրանցվում։ Նմանատիպ իրավիճակ, Զարուհի Գրիգորյանի խոսքով, դիտվել է ամբողջ աշխարհում։

Ջրծաղիկի դեպքերը նախորդ տարվա համեմատ 1․5 անգամ աճել են, իսկ ահա քովիդի դեպքերը նվազել։

Անդրադառնալով սուր շնչառական վարակներով պայմանավորված իրավիճակին՝ նա նշել է, որ գրանցվել է սեզոնային աճ, ինչը, սակայն, արտառոց չէ։ Նախորդ տարվա համեմատ այս տարի սուր շնչառական վարակներով պայմանավորված վիճակն ավելի կայուն է։

Ազգային օրացույցով կարմրուկի դեմ պատվաստումները նախատեսված են 1 և 4-6 տարեկան երեխաների համար: Միաժամանակ, պատվաստման են ենթակա նաև կարմրուկով հիվանդների հետ շփված այն անձինք, ովքեր չունեն կարմրուկի դեմ 2 դեղաչափ պատվաստում:

Կարմրուկը խիստ վարակիչ վիրուսային հիվանդություն է, որին բնորոշ է բարձր ջերմությունը, տարածուն բծավոր ցանը և հազը, հարբուխը կամ շաղկապենաբորբը: Թեև կարմրուկը համարվում է մանկական վարակ, բայց վերջի տարիների վարակի 1/3-րդ դեպքերը արձանագրվում է մեծահասակների շրջանում: Մոտ 30 տոկոս դեպքերում կարող են զարգանալ նաև հիվանդության բարդություններ` թոքաբորբ, լարինգո-տրախեաբրոնխիտներ, միջին ականջի բորբոքում, գլխուղեղի և նրա թաղանթի բորբոքում: