Forbes․ Starlink-ը կարող է ամրապնդել ՀՀ թվային և տնտեսական անկախությունը

PanARMENIAN.Net - Ամերիկյան Forbes ամսագիրը հրապարակել է ծավալուն հոդված, որտեղ ներկայացվում են ամերիկացի գործարար, միլիարդատեր Իլոն Մասկի Starlink արբանյակային ինտերնետի ծրագրի մեկնարկն ու դրա հնարավոր ազդեցությունը Հայաստանում։

Հոդվածի հեղինակ Քրեյգ Սմիթը նշել է, որ Starlink-ը Հայաստանի համար կարող է դառնալ ոչ միայն տեխնոլոգիական նորամուծություն, այլև ռազմավարական նշանակության գործիք՝ ամրապնդելով երկրի թվային և տնտեսական անկախությունը, հայտնում է Արմենպրեսը։

Հոդվածում մանրամասն ներկայացվում է, թե ինչպես է Starlink-ը փոխելու Հայաստանի թվային ենթակառուցվածքները։ Հատկապես շեշտվում է, որ երկրի լեռնային տեղանքը և հեռավոր գյուղական համայնքները տարիներ շարունակ տուժել են կայուն և արագ ինտերնետ կապի բացակայությունից։ Starlink-ի միջոցով գերարագ ինտերնետը հասանելի կդառնա նույնիսկ ամենահեռավոր բնակավայրերում։ Սմիթն օրինակ է բերում Հայաստանի Սյունիքի մարզի գյուղատնտեսների առօրյայից։

«Հեռավոր գյուղերի ֆերմերներն այժմ կկարողանան առցանց հետևել շուկայական գներին, նորագույն տեխնոլոգիաներին ու զարգացումներին։ Այսպիսով, գյուղական համայնքները կստանան աննախադեպ հնարավորություններ՝ կրթական, առևտրային և բժշկական ոլորտներում»,- գրում է հեղինակը։

Հատուկ ուշադրություն է դարձվում նաև այն փաստին, որ Starlink-ի միջոցով Հայաստանի ուսանողները հնարավորություն կստանան օգտվել համաշխարհային կրթական հարթակներից՝ վերջապես հավասար պայմաններ ունենալով կրթության հասանելիության տեսանկյունից։

Սմիթը Starlink-ի ներդրումը դիտարկում է նաև Հայաստանի անվտանգության և աշխարհաքաղաքական դիրքավորման համատեքստում։ Ներկայիս տարածաշրջանային լարվածությունը՝ Ադրբեջանի հետ հակամարտությունների ֆոնին, ավելի կարևոր է դարձնում կայուն և անվտանգ ինտերնետ կապի անհրաժեշտությունը։ Սմիթն ընդգծում է Ուկրաինայի օրինակը, որտեղ Starlink-ը կարևոր դեր խաղաց կապի պահպանման գործում ռազմական գործողությունների ընթացքում։ Հոդվածում նշվում է, որ Հայաստանում նման համակարգի ներդրումը կարող է ունենալ ռազմավարական նշանակություն՝ հակամարտության ժամանակ կապի խափանումներից խուսափելու համար։

Հոդվածում ներկայացվում են նաև Հայաստանի կառավարության ձեռնարկած քայլերը Starlink-ի ծրագրի արագացված ներդրման ուղղությամբ։

Սմիթը գրել է, որ Starlink-ի հաջողությունը Հայաստանում կարող է ունենալ լայն տարածաշրջանային ազդեցություն՝ խթանելով թվային վերափոխումն ամբողջ Կովկասում։ Հեղինակը հիշեցնում է, որ Հայաստանը կարող է դառնալ տեխնոլոգիական զարգացման առաջամարտիկ՝ ԵՄ և Ռուսաստանի միջև աշխարհաքաղաքական բարդ դաշտում։ Սմիթը եզրափակել է հոդվածը՝ ընդգծելով, որ Իլոն Մասկի Starlink-ը Հայաստանի համար տեխնոլոգիական նոր դարաշրջանի սկիզբ կարող է դառնալ։

ՀՀ բարձր տեխնոլոգիական արդյունաբերության նախարարությունը սերտորեն համագործակցում է SpaceX-ի հետ՝ կարգավորող խնդիրների լուծման, ենթակառուցվածքների ներդրման և անհրաժեշտ թույլտվությունների ապահովման համար։ Հանրային ծառայությունները կարգավորող հանձնաժողովը վերջերս հաստատել է Starlink-ի լիցենզավորման հայտը, ինչը նշանակում է, որ ընկերությունը շուտով կմտնի փորձարկման փուլ։ Բարձր տեխնոլոգիական արդյունաբերության նախարար Մխիթար Հայրապետյանը նշել է, որ փորձարկումները կավարտվեն առաջիկա ամիսներին, ինչից հետո Starlink-ը լիարժեք կգործարկվի։