ԿԲ․ Կենսաթոշակային ֆոնդերի ստեղծման պահից եկամտաբերությունը կազմել է մոտ 8%

23 դեկտեմբերի 2024 - 10:59 AMT

PanARMENIAN.Net - Կենտրոնական բանկը և ԱԺ Ֆինանսավարկային և բյուջետային հարցերի մշտական հանձնաժողովը պարտադիր կենսաթոշակային ֆոնդերի կառավարիչների հետ քննարկել են կենսաթոշակային ֆոնդերի կառավարման արդյունքները, ներդրումային որոշումների ընթացակարգերը, ինչպես նաև կապիտալի շուկայի զարգացման և կենսաթոշակային խնայողությունների՝ տնտեսության իրական հատվածում ներդրումների ընդլայնման հնարավորությունները, հայտնում է Կենտրոնական բանկը։

Նշվել է, որ կենսաթոշակային ֆոնդերի ստեղծման պահից եկամտաբերությունը կազմել է մոտ 8 տոկոս

Նշվել են նաև հետեևյալ հիմնական կետերը՝

Կենսաթոշակային ֆոնդերի ակտիվների կազմում ավելանում են իրական հատվածի ընկերությունների թողարկած արժեթղթերը։ Հատկանշական է, տեղական բաժնետոմսերում ներդրումների ավելացումը։ Շեշտադրվել է ընկերություններում կորպորատիվ կառավարման բարելավման կարևորությունը՝ կենսաթոշակային խնայողություններին հասանելիություն ստանալու համար:

Նախաձեռնված օրենսդրական փոփոխությունները կարող են էապես ընդլայնել իրական հատվածի ընկերություններում և ենթակառուցվածքներում ներդրումների հնարավորությունները։

Հանդիպման նպատակն էր ապահովել կենսաթոշակային խնայողությունների առավել արդյունավետ կառավարում և նպաստել տնտեսական աճին:

Կենսաթոշակային ֆոնդերի ստեղծման պահից եկամտաբերությունը կազմել է մոտ 8 տոկոս։ Ընդ որում, ՏՀԶԿ-ի կողմից հրապարակվող Pension Markets in Focus 2024-ի համաձայն, Հայաստանը կենսաթոշակային ֆոնդերի վերջին 10 տարվա անվանական եկամտաբերությամբ 48 երկրների շարքում զբաղեցնում է 12-րդ տեղը, իսկ իրական եկամտաբերությամբ՝ 7-րդ տեղը։

Պարտադիր կուտակային բաղադրիչին պարտադիր կարգով մասնակցում են 1974 թվականի հունվարի 1-ին և դրանից հետո ծնված` ա) վարձու աշխատողները և հանրային ծառայության մեջ գտնվող անձինք, բացառությամբ զինվորական ծառայողների և նրանց հավասարեցված անձանց, բ) նոտարները, գ) անհատ ձեռնարկատերերը: