ՀՀ և ԱՄՆ-ի հարաբերությունների նոր փուլը՝ քննարկումների առարկա քաղաքական և փորձագիտական շրջանակներում

PanARMENIAN.Net - Հայաստանի և ԱՄՆ-ի հարաբերությունների նոր փուլը քննարկումների ալիք է բարձրացրել քաղաքական և փորձագիտական շրջանակներում, հայտնում է «Ամերիկայի ձայնը»։

Հունվարի 14-ին Վաշինգտոնում Հայաստանի արտգործնախարար Արարատ Միրզոյանը և ԱՄՆ պետքարտուղար Էնթոնի Բլինքենը ստորագրել են ռազմավարական գործընկերության փաստաթուղթ՝ ամրապնդելով երկու երկրների համագործակցությունը։

Ամերիկյան կողմից փաստաթուղթը ստորագրած պետքարտուղար Էնթոնի Բլինքենը նշել է, որ ստեղծվելիք հանձնաժողովը հիմք է տալիս առանցքային ոլորտներում, ինչպես տնտեսություն, անվտանգություն, ժողովրդավարություն և արդարադատություն, համագործակցությունը զարգացնելու։ Նրա խոսքով՝ այս փաստաթուղթը կարևոր ներդրում է Հայաստանի ինքնիշխանության ամրապնդման հարցում։

Հայաստանի արտգործնախարար Արարատ Միրզոյանն ընդգծել է, որ Երևանն ու Վաշինգտոնը բարդ միջազգային պայմաններում հասել են գործընկերության նոր մակարդակի։ Միրզոյանը նաև նշել է միջուկային ոլորտում ԱՄՆ-ի հետ համագործակցության բանակցությունների մեկնարկի և «Իսլամական պետության» դեմ համաշխարհային կոալիցիային միանալու Հայաստանի մտադրության մասին։

Լրագրող Մարկ Գրիգորյանը փաստաթուղթը գնահատել է երկկողմ հարաբերությունների և տարածաշրջանային զարգացումների տեսանկյունից, ընդգծելով դրա երկարաժամկետ նպատակները։

«Այն ի զորու է ուժեղացնել Միացյալ Նահանգների ազդեցությունը տարածաշրջանում, որտեղ իրավիճակը բարդ է։ Պաշտոնական Երևանը ենթարկվում է թե՛ Բաքվի և Անկարայի, թե՛ Մոսկվայի ճնշմանը։ Ռուսաստանում հաճախ կրկնում են՝ եթե փորձեք մեզ լքել, ձեզ համար ավելի վատ կլինի»,- ասել է Գրիգորյանը։

Նա նաև հավելել է, որ փաստաթուղթը պետք է դիտարկել ներքաղաքական գործընթացների համատեքստում։

«Մեկուկես տարի անց խորհրդարանական ընտրություններ են, և իշխող կուսակցությունը կօգտագործի այս փաստաթուղթը որպես ապացույց, թե Հայաստանը շարժվում է դեպի Արևմուտք»,–ասել է նա։

Տարտուի համալսարանի Արևելյան հետազոտությունների կենտրոնի հետազոտող Բորիս Դոլգինը նշել է, որ փաստաթուղթը, չնայած հստակ երաշխիքներ չի տալիս, ցույց է տալիս, թե որ ուղղությամբ է շարժվում Հայաստանը։

«Արևմուտքի կողմից այս ընտրության աջակցությունը, թեև առաջացնում է զայրույթ Ռուսաստանում, Իրանում, Ադրբեջանում և Թուրքիայում, միևնույն ժամանակ ամրապնդում է Երևանի դիրքերը»,- ասել է Դոլգինը՝ ընդգծելով, որ Հայաստանի ղեկավարությունը փորձում է խուսափել կտրուկ քայլերից և շարունակում է պահպանել կապերը ԵԱՏՄ-ի և Ռուսաստանի հետ։

«Էխո Կավկազա» պարբերականի քաղաքական մեկնաբան Վադիմ Դուբնովն իր հերթին նշել է, որ Մոսկվան գնալով ավելի ակնհայտ է աջակցում Բաքվին հայ-ադրբեջանական հակամարտության հարցում։

«Այս պայմաններում Երևանը, կարծես, ստիպված է զարգացնել հարաբերությունները Արևմուտքի հետ»,- ասել է Դուբնովը։

Նա հավելել է, որ Արևմուտքի հետ հարաբերությունները կարող են զարգանալ նաև առանց այս փաստաթղթի, սակայն այն ունի խորհրդանշական նշանակություն՝ ցույց տալու, թե որ ուղղությամբ է Հայաստանը շարժվում։

Դուբնովը շեշտել է, որ Բաքվի համար այս քայլը ցանկալի չէր, քանի որ Ադրբեջանը ձգտում է մեկուսացնել Հայաստանը Արևմուտքից և կանխել հնարավոր աջակցությունը։

Մինչդեռ Ռուսաստանում հայ-ամերիկյան հարաբերությունների զարգացումը դժգոհություն է առաջացնում։ Հայտնի է, որ Նիկոլ Փաշինյանը բազմիցս մեղադրել է ռուսական պետական մեդիային՝ Հայաստանի դեմ քարոզչություն իրականացնելու համար։ Օրերս Հայաստանի արտգործնախարարությունը բողոքի նոտա է հանձնել Երևանում Ռուսաստանի դեսպանին՝ «Վեստի նեդելի» հաղորդման ժամանակ հնչած հայտարարությունների կապակցությամբ։

Մարկ Գրիգորյանի խոսքով՝ «Մոսկվայում չեն հասկանում, որ նման քարոզչությամբ միայն հեռացնում են Հայաստանին իրենցից»։ Նա հավելել է, որ Երևանում քննարկվում է ռուսական որոշ հաղորդումների արգելքի տարբերակը՝ նախադեպ ունենալով Վլադիմիր Սոլովյովի հաղորդումը։