ՀՀ էկոնոմիկայի նախարարությունը հերքել է ՌԴ–ից «Ջերմուկ Գրուպ»-ի հասցեին հնչած մեղադրանքները

PanARMENIAN.Net - Հայաստանի էկոնոմիկայի նախարարությունը հաղորդել է, որ ՀՀ Սննդամթերքի անվտանգության տեսչական մարմնի (ՍԱՏՄ) անցկացրած ստուգումների արդյունքներով ապացուցվել է, որ «Ջերմուկ» հանքային ջուրը համապատասխանում է միջազգային ստանդարտների պահանջներին և անվտանգ է սննդի մեջ օգտագործելու համար։ Այդ մասին ասել են նախարարությունից, հայտնում է Արմենպրեսը:

«Որևէ ընկերության դեմ դատական հայց ներկայացնելը գտնվում է միայն անձի կամ նրա իրավահաջորդների որոշման շրջանակում, և նախարարությունը այդ հարցը չի մեկնաբանում։ Ինչ վերաբերում է հայցի հիմնական նյութին, ապա ՍԱՏՄ-ն ռուսական կողմին է ներկայացրել ստուգումների հիման վրա ձեռք բերված փաստեր, որոնք ապացուցում են, որ «Ջերմուկ» հանքային ջուրը համապատասխանում է սահմանված միջազգային պահանջներին և նախատեսված է սննդային օգտագործման համար։ Հայկական կողմի ներկայացրած ապացույցների բավարար լինելը վկայակոչվում է նրանով, որ ՌԴ ողջ տարածքում «Ջերմուկ» ընկերության նկատմամբ կիրառված սահմանափակումները վերացվել են։ Համոզված ենք, որ արդար դատավարությունը ևս մեկ անգամ կհաստատի ընկերության անմեղությունը»,- ասված է նախարարության պաշտոնական հաղորդագրության մեջ։

«Ջերմուկ Գրուպ» ընկերությունը տեղեկացրել է, որ այս հարցի շուրջ հետագայում հանդես կգան պաշտոնական հայտարարությամբ։

Ռուսական լրատվամիջոցները հայտնել են, որ Ռուսաստանում թունավորումից մահացած ձեռնարկատեր Օլեգ Գուսովի ազգականները 1.5 միլիարդ ռուբլու փոխհատուցման պահանջով դատական հայց են ներկայացրել «Ջերմուկ Գրուպ»-ի դեմ՝ պնդելով, որ Գուսովի մահը տեղի է ունեցել «Ջերմուկ» հանքային ջրից առաջացած այրվածքներից։ Նրանց պնդումների համաձայն՝ շշի մեջ հայտնաբերվել է քացախաթթու։