Արաղչի. Թեհրանը պատրաստ է նպաստել տարածաշրջանում խաղաղության և կայունության հաստատմանը

PanARMENIAN.Net - Իրանի արտաքին գործերի նախարար Աբբաս Արաղչին Հայաստանի ԱԳ նախարարի տեղակալ Վահան Կոստանյանի հետ հանդիպմանն ասել է, որ Թեհրանը պատրաստ է նպաստել տարածաշրջանում խաղաղության և կայունության հաստատմանը։

Արաղչին բարձր է գնահատել Թեհրանի և Երևանի միջև բարիդրացիական հարաբերությունները՝ շեշտելով երկկողմ կապերի հետագա զարգացման կարևորությունը, հայտնում է Արմենպրեսը Mehr գործակալության վրա հղումով։

Կոստանյանը բարձր է գնահատել Իրանի դիրքորոշումները Հարավային Կովկասի զարգացումների հարցում՝ ընդգծելով խաղաղության և անվտանգության հաստատման կարևորությունը։

«Հայաստանի արտաքին քաղաքականությունը հիմնված է բարիդրացիական հարևանության քաղաքականության շարունակման և Իրանի հետ բոլոր ուղղություններով հարաբերությունների զարգացման վրա»,- նշել է Կոստանյանը։

Աշխատանքային այցով Թեհրանում գտնվող ՀՀ ԱԳ նախարարի տեղակալ Վահան Կոստանյանը հանդիպում է ունեցել նաև ԻԻՀ գերագույն առաջնորդի խորհրդական, Արտաքին հարաբերությունների ռազմավարական խորհրդի ղեկավար Քամալ Խարազիի և ԻԻՀ ԱԳ նախարարի քաղաքական հարցերով տեղակալ Մաջիթ Թախթ Ռավանչիի հետ:

Կոստանյանը Քամալ Խարազիին է ներկայացրել Հայաստանի արտաքին քաղաքականության օրակարգային հարցերին ու տարածաշրջանային վերջին զարգացումներին առնչվող գործընթացների մանրամասները։

Կոստանյանը Թեհրանում հանդիպել է նաև ԻԻՀ ԱԳ նախարարի քաղաքական հարցերով տեղակալ Մաջիթ Թախթ Ռավանչիին: Ընդգծվել է միմյանց արտաքին քաղաքական առաջնահերթությունների նկատմամբ փոխադարձ հարգանքը: Կոստանյանը զրուցակցին է ներկայացրել նաև Հայաստան-Ադրբեջան հարաբերությունների կարգավորման գործընթացի վերջին զարգացումները՝ ընդգծելով, որ Հայաստանը հավատարիմ է խաղաղության օրակարգին և նույնն ակնկալում է Ադրբեջանից: Այս համատեքստում կարևորվել է Հայաստանի դիմակայունության բարձրացմանն ուղղված քայլերը: