Ավինյան․ Փետրվարի 1-ից տրանսպորտից օգտվելու համար առաջարկում ենք 8 տեսակի ուղետոմս

PanARMENIAN.Net - Երևանի քաղաքապետ Տիգրան Ավինյանը հայտարարել է, որ փետրվարի 1-ից տրանսպորտից օգտվելու համար առաջարկվում է 8 տեսակի ուղետոմս։ Այդ մասին նա գրել է ֆեյսբուքյան իր էջում:

«Փետրվարի 1-ից հանրային տրանսպորտից օգտվելու համար առաջարկում ենք 8 տեսակի ուղետոմս: Բացի այդ, սահմանել ենք արտոնություններ մի շարք խմբերի համար, ինչպես նաև անվճար երթևեկելու հնարավորություններ»,– ասվում է գրառաման մեջ։

Նա հավելել է, որ օգտվելով Transport.yerevan.amկայքից՝ հնարավոր է՝

· ընտրել հարմար տոմսը համեմատության գործիքի միջոցով,

· հաշվիչի օգնությամբ գտնել ամենաշահավետ տարբերակը,

· առցանց ձևակերպել արտոնությունները՝ առանց տնից դուրս գալու։

Ավինյանը քաղաքացիներին հորդորել է ծանոթանալ մանրամասներին և ավելի արդյունավետ կազմակերպել իրենց երթևեկությունը։

Երևանի նախկին քաղաքապետ Հայկ Մարությանը, որը հանդես է գալիս փետրվարի 1–ից տրանսպորտում ուղեվարձի թանկացումը բոյկոտելու կոչով, հայտարարել է, որ թանկացված ուղեվարձը չվճարելու համար 50,000 դրամ տուգանելու օրենսդրական որևէ դրույթ չկա։

Փետրվարի 1-ից ուժի մեջ կմտնի հանրային տրանսպորտի նոր սակագինը։ Քաղաքապետարանը հայտարարել է, որ տրանսպորտի ուղեվարձի վճարման 4 եղանակ է նախատեսված՝ տրանսպորտային քարտով, QR կոդով, բջջային հավելվածի միջոցով և բանկային քարտով։