Ֆինանսական համակարգի հաշտարարի գրասենյակն ամփոփել է 16 տարվա գործունեության արդյունքները

23 հունվարի 2025 - 18:38 AMT

PanARMENIAN.Net - 2025 թվականի հունվարի 24-ին լրանում է Հաշտարարի գրասենյակի գործունեության 16 տարին։ Այդ ընթացքում Հաշտարարի ինստիտուտը կայացել է և գրանցել բազմաթիվ ձեռքբերումներ։

Ստորև ներկայացվում է 2024 թվականի ընթացքում Գրասենյակ ներկայացված բողոքների և քննված պահանջների վիճակագրությունը, ինչպես նաև Գրասենյակի կողմից «Սպառողների ֆինանսական իրազեկման» ծրագրի շրջանակում իրականացված միջոցառումների վերաբերյալ հակիրճ տեղեկատվություն։

Գրասենյակ ներկայացված բողոքների և քննված պահանջների մասին վիճակագրություն¹

2024 թվականին Գրասենյակ է ներկայացվել 18,583 բողոք, որոնցից 16,816-ը վերաբերել է ֆինանսական համակարգին: Գրասենյակի աշխատակիցների օգնությամբ ֆինանսական կազմակերպություններին ուղղված բողոքներից 337-ը բավարարվել են մինչև Գրասենյակում քննության ընդունվելը։ Գրասենյակի կողմից 2024 թվականին քննության է ընդունվել 6374 պահանջ, որոնց քննության արդյունքում գործերի 61.2%-ը լուծվել է հօգուտ հաճախորդների (քննության ընդունված 6391 պահանջներից 381-ը 20.01.2025 թվականի դրությամբ դեռևս գտնվում է քննության փուլում): Ընդ որում, դրական ելքով գործերի 93.9%-ը լուծվել է կողմերի միջև հաշտությամբ: Պահանջի քննության միջին տևողությունը կազմել է 33 օր։

2024 թվականին գրանցվել է զեղծարարության հետ կապված պահանջների աճ։ Ֆինանսական համակարգի հաշտարարը ևս մեկ անգամ հորդորում է չտրամադրել անձնական տվյալները և գաղտնաբառերը այլ անձանց և չլրացնել քարտային տվյալները ոչ հավաստի հղումներով ներկայացված հարթակներում, այլապես կարող եք կրել ֆինանսական կորուստներ։

«Սպառողների ֆինանսական իրազեկման» ծրագրի շրջանակում իրականացված միջոցառումներ

2024 թվականի ընթացքում «Սպառողների ֆինանսական իրազեկման» ծրագրի շրջանակում իրականացվել են ֆինանսական կրթման մի շարք միջոցառումներ, մասնավորապես՝ «Աշակերտների հյուրընկալում Գրասենյակում», «Ֆինանսական գրագիտության եռօրյա դպրոց», «Հաշտ ճամբար», «Զրույց կանանց հետ ֆինանսական ծառայությունների մասին», հանդիպում-սեմինարներ քոլեջների և համալսարանների ուսանողների համար և այլ միջոցառումներ, որոնց ներգրավված են եղել տարբեր թիրախային խմբերի ավելի քան 3300 մասնակիցների, այդ թվում՝ աշակերտներ, ուսանողներ, ուսուցիչներ, անապահով ընտանիքների երեխաներ, կանայք, գյուղական համայնքների բնակիչներ, տարբեր կազմակերպությունների աշխատակիցներ և այլն։

¹ Տվյալները ներկայացված են 2025 թվականի հունվարի 20-ի դրությամբ։¹ Տվյալները ներկայացված են 2025 թվականի հունվարի 20-ի դրությամբ։