Պրոդյուսեր Ռուբեն Մխիթարյանը որոշել է առաջադրվել որպես Գյումրիի քաղաքապետի թեկնածու

PanARMENIAN.Net - Պրոդյուսեր և հասարակական գործիչ Ռուբեն Մխիթարյանը հայտարարել է, որ որոշել է առաջադրվել որպես Գյումրու քաղաքապետի թեկնածու։ Նա այդ մասին հայտնել է ֆեյսբուքյան ուղիղ եթերում։

«Իմ հզոր համայնք» շատ մարդակենտրոն կուսակցության միջոցով շուտով ներկայացնելու եմ նոր քաղաքական և հայտնի համայնքային դեմքերի»,- նշել է նա։

Մխիթարյանը հայտարարել է, որ Գյումրու և Հայաստանի «հիմնական խնդիրն իր համար «նիկոլիզմ» կոչվող երևույթն է, ինչպես նաև այն անձը, որը ներկայումս բնակվում է Երևանի կառավարական ամառանոցներից մեկում»։

Նա հավելել է, որ օրվա իշխանությունները հաջողություն չպետք է գրանցեն Գյումրիի ընտրություններում և դա է դրդում նրան մասնակցել գործընթացին։

«Ես Գյումրու քաղաքապետի մյուս թեկնածուներին ինձ հակառակորդ, առավել ևս թշնամի չեմ համարում, որովհետև բոլորս էլ քաղաքի մարդիկ ենք ու իրար ճանաչում ենք: Bայց դիրքորոշումս շատ հստակ է՝ Գյումրի քաղաքի ընտրություններում օրվա իշխանությունները հաջողություն չպետք է գրանցեն և այդ արդյունքին հասնելու համար ես պատրաստ եմ համագործակցել նման հստակ դիրքորոշում ունեցող Գյումրիի քաղաքապետի մնացած բոլոր թեկնածուների հետ»,–ասել է նա։

Ըստ նրա՝ ընտրությունների դրական արդյունք ինքը համարելու է իշխանությունների տապալումը, իսկ թե որ դեմքի կամ որ դեմքերի միջոցով դա տեղի կունենա, իր համար էական չէ։

Նա հույս է հայտնել, որ գյումրեցիները հավանություն կտան իրենց ներկայացված Գյումրու զարգացման ծրագրին։

«Ձեզ սպասվում է երկրի լավագույն քարոզարշավը, որը լինելու է իրատեսական, պայծառ, դրական ու ամենակարևորը՝ գյումրվա»,–ասել է Մխիթարյանը։

Ընտրությունները կայանալու են մարտին, հստակ օրը դեռ չի որոշվել։

2024–ի հոկտեմբերին Գյումրիի ավագանու «Բալասանյան դաշինքի» բոլոր անդամները վայր էին դրել իրենց մանդատները, այդ թվում նաև քաղաքապետ Վարդգես Սամսոնյանը։ Գյումրիում դեկտեմբերի 8-10-ը տեղի ունեցան քաղաքապետի ժամանակավոր պաշտոնակատարի նախնական ընտրություններ, որոնց արդյունքներով որոշվեց քաղաքապետի ժամանակավոր պաշտոնակատարը՝ անկուսակցական Սարիկ Մինասյանը: